Tajribali mutaxassis Jafar Irismetov Farg'ona klubida bosh menejer sifatida ish boshladi. Biz bu borada Jafar Irismetovning fikrlari bilan qiziqdik.

- "Paxtakor"ni tark etganingizdan so'ng katta futbolga yani ish jarayoniga qaytdingiz. Bu payt ichida sizda "Neftchi", "Bunyodkor"dan takliflar bo'ldi. Nima uchun bu o'tishlar avvalroq amalga oshmadi, qanday omillar to'sqinlik qilayotgandi?

- "Paxtakor"ni tark etganimdan so'ng biroz dam oldim. 5 yil davomida klub bilan ancha yutuqlarga erishdik. Bir yildan so'ng ko'p jamoalardan takliflar bo'ldi. Ayrim sabablarga ko'ra kelisha olmadik. Qaerdadir qarashlarimiz to'g'ri kelmadi. Mana "Neftchi"da ish boshladik, o'ylaymanki yaxshi jamoa tuzgan holda munosib natijalar ko'rsata olamiz.

- Umuman klubdagi vaziyat, o'zingizni talablaringizga mos sharoit barchasi to'g'ri keldimi?

- "Neftchi"dan 2 yil avval ham taklif bo'lgan edi. Ayrim omillar hisobiga ishlashimiz nasib qilmagan ekan. Klubda qilinadigan ishlar ko'p. Sekin-asta kamchiliklarni bartaraf etamiz. Oldimizga qo'yilgan maqsad ikki yil ichida yaxshi natija qayd etib, yoshlarga etibor berish. Umuman olganda har tomonlama tayyor chempion jamoani shakllantirishimiz kerak.

- Ishni esa tarkibni kuchaytirishdan boshlab yubordingiz. Tarkibni yig'ishda nimalar ko'proq etiborga olinmoqda? Yana kuchayish jarayoni davom etadimi?

- Vitaliy Levchenkoning o'yin uslubidan kelib chiqib tarkibni shakllantiryapmiz. Baribir u bosh murabbiy. Deylik har bir murabbiy o'ziga mos futbolchi olishni istaydi. "Neftchi"da avvalgi yillarda himoya chizig'i doim kuchli bo'lgan, hujumda esa aksincha muammolar ko'p kuzatilgan. Bu poziciyaga Toma Tabatadze, Zoran Marushich kabi futbolchilar jalb qilindi. Jamoani kuchaytirish uchun maksimal harakat qilamiz.

- Oldinda yana qanday o'zgarishlar, qilinadigan ishlar kutilmoqda? Sport direktori sifatida "Paxtakor"da chempionlikni ko'lga kiritgansiz. "Neftchi"da yangi mavsumda ambiciyalar qanday bo'ladi?

- Hozir faqat tanishish jarayoni ketmoqda. Infratuzilma bilan tanishib chiqmoqdaman. Yoshlar, o'rinbosarlar jamoalariga alohida etibor qaratilishi zarur. Bu jamoalardan qattiq selekciya olib boriladi. Ikki yil ichida ularni "Neftchi" bosh jamoasiga jalb qilish vazifalarimizdan biri hisoblanadi. Bir yil ichida qilamiz deyish noto'g'ri. Hozirgi vaqtda "Neftchi" chempionlik uchun kurashadi. Shu bois bu jarayon biroz qiyinroq kechadi.

- Tashkiliy tomondan "Neftchi"ni muammolar ko'p qiynab kelgan, qarzdorlik, legionerlar bilan shartnomalardagi muammolar va hokazo. Bu ishlar ham tartibga solinadimi?

- Bu ishlarni tartibga solmasak bo'lmaydi. Chempionlik uchun kurashadigan jamoada kamchilik, mayda detal qolib ketmasligi kerak. Birdaniga bartaraf etish oson ish emas. Biz ham bittada amalga oshishini istaymiz. Lekin ish jarayonida har bir muammoni echimini topishga harakat qilamiz. Kichik muammolarni endi o'rganishni boshladim. 1-2 kunda bitadigan ish emas. Har bir narsa soat mexanizimi kabi ishlasagina chempionlik haqida gapirishimiz mumkin. Futbolchilarni oldi degani chempionlikni anglatmaydi. Tashkiliy ishlarni to'g'ri yo'lga qo'yish, futbolchilar bilan muammolarni echish orqali kuchli jamoa shakllantiramiz, rahbariyatimiz katta etibor berayotganini takidlamoqchiman. Bu omil yani rahbarning futbolga qiziqishi ham ko'p narsalarga tasir qiladi.

Jafar Irismetov: "Futbolchilar olingani chempionlikni anglatmaydi"