"O'yin haqida hech nima demoqchi emasman. Shunchaki raqibimizni g'alaba bilan tabriklayman", - deya fikr bildirdi Jamshid Saidov.

- Asosiy darvozabon Roberts Ozols bugun qaydnomadan o'rin olmadi. Bu holat "Metallurg"ga qarshi kechgan o'yinda jarohat olgani bilan bog'liqmi? Asosiy darvozabon hali safga qaytmadimi?

- Ha, unda jarohat bor. U endigina safimizga qo'shildi.

- Bugungi uchrashuv jamoangiz uchun qo'yi pog'onalardan uzoqlashish uchun yaxshi imkoniyat edi. To'g'ri, "Olimpik" yosh va kurashuvchan jamoa, lekin ushbu jamoa ancha vaqtdan buyon g'alaba qozonmayotgandi. Bugun "Qizilqum" har doim namoyish etadigan jangovar o'yinni ko'rmadik. Bunga sabab nima bo'ldi?

- Futbolchilar har bir uchrashuv qanday katta ahamiyatga ega ekanligini bilishadi. Afsuski, bugun biz yaxshi o'yin namoyish eta olmadik. Shu sababli o'yin haqida hech nimani gapirishni istamayman. O'yinni nazorat qildik va to'pga egalik qildik, ammo qarshi hujumda gol o'tkazib yubordik. Ikkita qarshi hujumda ikkita to'p o'tkazib yubordik, ammo bor-yo'g'i bitta gol hisoblandi.

- Chempionat yakuniga qadar beshta bahs qoldi. Keyingi uchrashuv "Paxtakor"ga qarshi kechadi. Nima deb o'ylaysiz, yana necha ochko jamoangizni Superligada jon saqlab qolishi uchun etarli bo'ladi?

- Hali o'yinlar ko'p. Oldindan bir narsa deyish qiyin. Vaqt barchasini aniqlab beradi.

Jamshid Saidov: "O'yin haqida gapirishni istamayman"