"Bugun muxlislarga yoqadigan hujumkor o'yin guvohiga aylandik deb o'ylayman. Dastlabki 10-15 daqiqalikda kirishib olish qiyin kechdi, keyin o'yinni o'z qo'limizga oldik. Amalga oshirgan zaxiralarimiz ham samara berdi",- deydi Kamoliddin Tojiev.

- "Paxtakor" avvalgi o'yinlarga qaraganda sermahsullik ko'rsatdi. Oldingi chiziqda ko'p gol urdi. Bu raqibning ochiq o'yin ko'rsatgani bilan bog'liqmi yoki barchasi shunchaki ideal bo'ldimi?

- "Andijon"ning o'yinlarini tahlil qilgan edik. Qolaversa, o'zimiz ham hujumkor taktikada 4ta himoyachi bilan maydonga tushdik. Gol urishimiz kerak edi. Oldinda OCHL uchrashuvi kutib turibdi. Oldingi chiziqdagi o'yinimizni ko'rib olishni reja qilgandik.

- Otabek Jo'raqo'zievning o'yinida pasayish bordek taassurot qoldirmoqda...

- "Paxtakor"ga hamma ham kelib birdaniga o'ynab ketmaydi. Yangi jamoaga moslashish kerak. Uning ustida ishlayapmiz.

- Zaxiradan maydonga tushgan Muhammadali O'rinboevdan ko'nglingiz to'ldimi? Diyor Holmatov nima uchun ko'rinmadi?

- Muhammadali O'rinboevdan ko'nglimiz to'ldi. Zaxiradan maydonga tushdi va gol urdi. Agar shunday davom etsa hamma o'yinda imkoniyat olishi mumkin. Diyor Holmatov jarohatini davolamoqda.

- Dilshod Saitov birinchi bo'limda ko'p xatoga yo'l qo'yganiga munosabatingiz?

- Ancha vaqtdan beri o'ynamagani uchun kirishib keta olmadi. U ko'proq o'ynashi kerak va shu orqali ishonchni orttirib oladi.

Kamoliddin Tojiev: "Muxlislarga yoqadigan hujumkor o'yin guvohiga aylandik"