Kosonsoydagi Markaziy o'yingoh muxlislar bilan gavjum bo'ldi. Shuningdek, mazkur o'yinga bo'lgan qiziqishni ortishiga “Neftchi”ning sobiq o'yinchilari Mansur Saidov, Baxtiyor Yoqubov va Shukur Po'latovlar ilk bor farg'onaliklarga qarshi to'p surishlari ham sabab bo'ldi. Ularni “Neftchi”ga qarshi bahsda qanday o'ynashlari barchani birdek qiziqtirayotgandi. 1:1 hisobi qayd etilgan vodiy derbisida Mansur Saidov “Navbahor”ni jamoa sardori sifatida maydonga boshlab tushgani ham etiborga molikdir. Uchrashuv yakunlangach Saidovdan intervyu oldik.

- “Neftchi”ga qarshi “Navbahor” sardori sifatida to'p surdingiz. Aytingchi, uchrashuvdan avval his-hayajon bo'ldimi?
- Albatta bo'ldi. To'g'risi, “Neftchi”ga qarshi faoliyatimda birinchi marta o'ynaganim bois g'alati hissiyotlar sezildi. Shu bilan birga o'ziga yarasha bosim ham bilindi. Hammasini ko'z oldimga keltirib bo'layotgan ishlarga ishonish qiyin bo'ldi.

- Sobiq jamoangiz haqida nima deya olasiz? “Neftchi”ning ko'rsatgan o'yini Sizga qanday ko'rindi?
- Ularning o'yini haqida gapiradigan bo'lsam, yaxshi o'ynashdi. Aslida bunday derbilarda jamoalarning tarkiblari qanday holatda bo'lishidan qatiy nazar doimo hujumkor va qiziqarli uchrashuvga guvoh bo'lamiz. Bugun kombinaciyalarga boy o'yin bo'lgani yo'q. Asosan to'pni havodan oshirish orqali o'yin tashkil qilindi.

- Bunday o'yin bo'lishiga nima sabab bo'ldi deb o'ylaysiz?
- Birinchidan maydonning holati kombancion o'yin ko'rsatishga yo'l qo'ymasdi. Ikkinchidan ikkala jamoada ham bosim kuchli edi. Ayniqsa, bizga rosa bilindi. Negaki, “Neftchi”ning sobiq uch nafar futbolchisini “Navbahor” safida maydonga tushgani uchun ham ular bizga qarshi yanada yaxshiroq tayyorlanishgan. Umuman olganda, texnik va taktikaga asoslangan o'yin bo'lgani yo'q. Ikkala jamoa o'zi istagan kombinaciyalarga boy o'yinni namoyish eta olmadi.

- Nima bo'lgan taqdirda ham uchrashuvni derbiga xos tarzda o'tdi deb ayta olasizmi?
- Albatta, umumiy olib qaraganda, bellashuv yaxshi bo'ldi. Jamoalar ishtirokida kurashchan o'yin kechdi. Ayniqsa, ikkinchi qavatda kurash keskin kechdi.

- Qayd etilgan 1:1 hisobidan qoniqish hosil qildingizmi?
- Bunday olib qaraganda, yutishimiz kerak edi. Ayrim vaziyatlarda to'pni ataylab maydon tashqarisiga chiqarib yuborsak, raqib o'yinchilari halol o'yin qoidasiga amal qilmay to'pni qaytarib berishmadi. To'g'risini aytsam, bunday xatti-harakatlar futbolga xos emas. Bizga nisbatan ham qo'pollik ishlatishdi. Lekin, farg'onalik bo'lganimiz uchun ham o'zimizni bosdik. Baribir ertaga ikkinchi davrada “Neftchi” maydoniga boramiz. Farg'onalik muxlislarning hurmati uchun qo'pollik qilganlarga javob qaytarmadik. O'yindan avval har qanday holatda ham o'zimizni vazmin tutib og'ir bosiqlik bilan o'ynashga kelishib olgandik. “Neftchi”ning har bir sobiq futbolchisiga biriktirilgan o'yinchilar butun uchrashuv davomida taqib qildi. Masalan, menga ham alohida o'yinchi biriktirilgandi.

- Ikkinchi bo'lim ancha jonli tarzda kechdi. Shukur Po'latov hisobni ochganidan keyin bellashuv oxirlariga yaqin hisob tenglashdi. Umuman, bu holat alamli bo'lgandir-a?
- Albatta, alam bo'ldi. Aytdimku, bu uchrashuvda yutishimiz lozim edi. Achinarlisi, darvozamiz pala-partish holatda ishg'ol qilindi. Nima ham qila olardik? Bugun durang bo'lishi kerak ekan, shunday bo'ldi.

- To'g'risi, “Neftchi”ga qarshi sardorlik bog'ichi ostida maydonga tushishingizni kutmagandik...
- Jamoamiz sardori Ilhom Boydadaev mashg'ulot paytida jarohat oldi. Jamoadagi ikkinchi sardor men edim, uchinchisi esa Alisher Mahmudov. “Neftchi”ga qarshi Alisher zaxirada qoldi. Shunchaki sardorlik bog'ichi bilan o'ynashim sobiq jamoamga qarshi uchrashuvga to'g'ri kelib qoldi.

- Bu ham Sizga yanada ko'proq masuliyat yuklagani tabiiy, to'g'rimi?
- Albatta. Har bir uchrashuvda o'ziga yarasha masuliyat bo'ladi. Boz ustiga “Neftchi”ga qarshi o'yindagi bosim va masuliyat har qachongisidan yuqori darajada bo'ldi. Hamma ushbu bahsda qanday to'p surishimizga qiziqish bildirgandi. Namanganlik muxlislar ham sobiq jamoamizga qarshi qanday o'ynashimizni kutishgandi. O'z navbatida farg'onaliklar bizning qanday holatda to'p surishimizga qiziqishdi. Boya aytganimdek, hamma uchrashuvlardan ko'ra ko'proq bosim va masuliyat bo'ldi.

- Uchrashuv o'rtalarida o'rningizni boshqa o'yinchiga bo'shatib berdingiz. Nima uchun?
- Bu jarohat bilan bog'liq edi. Bir vaziyatda to'qnashuv yuz berdi va maydonga yon boshim bilan yiqilib tushdim. Bu esa to'liq kuch bilan to'p surishimga to'sqinlik qildi. Keyinchalik og'riq kuchaygani bois zaxiraga chiqishga majbur bo'ldim.

- O'tgan turda “Buxoro” maydonidan g'alaba bilan qaytishinglarni ko'pchilik kutmagandi.
- Aslida “Navbahor” yaxshi jamoa va bu erda ajoyib tarkib yig'ilgan. Murabbiylar ham nima qilish kerakligini juda yaxshi bilishadi. Safarda g'alabani xohlagandik va o'z maqsadimizga erishdik. Lekin, “Neftchi”ga qarshi bahsda Baxtiyor Yoqubov, Shukur Po'latov va menga nisbatan bosim har qachongidan kuchli bo'ldi. Bundan tashqari tarkibimizda yo'qotishlar ham bor edi. Umuman olganda, o'z o'yinimizni ko'rsata olmadik.

- “Navbahor” uchun oldinda yana bir jiddiy o'yin turibdi. Yani keyingi turda “Nasaf”ga qarshi to'p surasizlar. Bugungi durangdan so'ng navbatdagi bellashuvga qanday tayyorgarlik ko'rasizlar?
- Keyingi uchrashuv “Neftchi”ga qarshi o'yindan ham kuchli bo'ladi. “Nasaf”ga qarshi bugungidek havodan to'p uzatiladigan o'yinlar emas, haqiqiy futbol bo'ladi. Chunki bo'lajak raqibimiz pas o'ynashni yaxshi ko'radi. Shunga yarasha biz ham o'z taktikalarimizni qo'llashga harakat qilamiz. Baribir “Nasaf” bilan bo'ladigan bahsga tayyorgarlik boshqacha bo'ladi. Aslida har bir uchrashuvda g'alaba uchun maydonga chiqamiz. Lekin, futbolda doim kutilmagan natijalar bo'lib turadi. Nima bo'lishini o'sha kuni ko'ramiz.

Mansur Saidov: “Bosiqlik bilan o'ynamasak bo'lmasdi”