Namanganliklarning ushbu muvaffaqiyati tufayli muxlislarni yanada quvonishgani bor gap. “Navbahor” safida mahoratli o'yinchilarning to'p surayotgani jamoaning hujumkor va ishonchli o'yin ko'rsatishiga sabab bo'lmoqda. Bu borada Mansur Saidovni alohida tilga olib o'tish o'rinlidir. Mahoratli yarimi himoyachi “Navbahor”ga o'z tajribasi bilan asqotmoqda. “Andijon”ga qarshi bahsda ham uning g'alabaga qo'shgan hissasi katta bo'lganligini barcha ko'rdi. Shuni ham alohida aytish kerakki, ilk bor “Navbahor” tarkibida “Andijon”ga qarshi “vodiy derbi”sida to'p surdi. Yakunda Saidovning yangi jamoasidagi ilk “derbi”si omadli chiqdi.

- Ilgari “Neftchi” safida ko'plab “vodiy derbi”larida ishtirok etgansiz. Bu safar esa ilk bor “Navbahor” tarkibida “derbi”da qatnashdingiz. Bu orada qanday farqlarni sezdingiz?
- O'rtada katta farq yo'q. “Derbi”lar oldindan qattiq kurashlar ostida kechadi. Ikkala jamoa ham doimo bir-biriga qarshi jiddiy tayyorlanishadi.

- Umuman olganda, o'yin haqida qanday taassurotlar qoldi?
- Uchrashuvga yaxshi hozirlik ko'rib jiddiy maqsadda maydonga tushgandik. Vazifa faqat g'alaba qozonish edi va buni bajardik. “Derbi”da muvaffaqiyat qozonish yanada yoqimli.

- “Vodiy derbi”si o'z nomi bilan “derbi” sanaladi. Bu safargi “Navbahor” – “Andijon” bellashuvi oldingi yillardagi kabi shiddatli kechdi deb ayta olasimzi?
- Rostini aytsam, avvalgi yillardagichalik shiddatli kechgani yo'q. Uchrashuvni bundan-da qiyin bo'ladi deb o'ylagandik. Vaqtida birinchi golni urganimizdan keyin ishimiz ancha osonlashdi. Lekin, bahs ancha tajovuzkor o'tishini taxmin qilib “Andijon”ga qarshi puxta hozirlik ko'rgandik. G'alaba juda kerak edi. O'z navbatida “Andijon”ni ochkosini kamligini bilardik. Etibor bersak, ular har bir o'yinda himoyaga asosiy etiborni qaratib faqat orqada o'ynashyapti. Shu bois bizga qarshi uchrashuvda ham andijonliklar himoyaga “yotib” olsalar qiyin bo'ladi deb o'ylagandik. Mashg'ulotlar davomida ham shunga yarasha tayyorgarlik ko'rgandik.

- “Andijon”ning o'yini hech kimga yoqmadi. Sizningcha, ularning kuchsiz tomonlari nimada?
- “Andijon”ning tarkibi yomon emas, yaxshi. Lekin, ularning ko'rsatayotgan o'yini mazmunsiz. Omad etishmayotgandek bo'lmoqda. Uchrashuv davomida ham futbolchilari bir-birlariga jahl qilishyapti. Bu orqali “Andijon” jamoasida tarqoqlik yuzaga kelgan deyish mumkin. Bir so'z bilan aytganda ular hamjihatlikni ko'rmadim.

- Boshida Sizga “Andijon”dan ham taklif bo'lgan. Ammo, yakunda “Navbahor”ni tanladingiz. Vaqti kelib bu qaroringiz to'g'ri ekanligini tushunib etgandirsiz?
- Ha, 100 foizga to'g'ri qaror qabul qildim. Boshqa jamoalardan ham takliflar bo'lgandi. Lekin, “Navbahor”ni tanlaganimdan afsuslanmayman.

- Keyingi turda “Paxtakor”ga qarshi muhim o'yin kutmoqda. Tabiiyki, “Andijon” ustidan qozonilgan g'alaba jamoaga foyda keltirish turgan gap. Aytingchi, “Paxtakor” bilan o'tadigan uchrashuvda muvaffaqiyat qozonish uchun nima qilish kerak?
- Har bir uchrashuvda maydonga faqat g'alaba uchun tushamiz. Bu safar ham uch ochkoni maqsad qilib harakat qilamiz. Omadni ham jamoamiz tomonida bo'lishini istaymiz. To'g'risini aytsam, har bir o'yin qiyin kechmoqda. Hech qachon oson bo'lmadi. “Paxtakor”ga qarshi bellashuv ham shular qatorida bo'ladi.

- Birinchi davradan keyin “Neftchi”ga qaytishingiz mumkinligi haqida ko'p gapirishyapti.
- Bu hozircha tashqaridagi gap-so'zlar. Birinchi davra tugashiga beshta tur bor. Ayni paytda faqat qolgan o'yinlarni ham muvaffaqiyatli o'tkazib birinchi davrani yaxshi holatda tugatishni o'ylamoqdaman. qolganini birinchi davradan keyin ko'ramiz. Nima bo'lishini vaqt ko'rsatadi.

- “Navbahor”da hamma narsa qoniqtiryaptimi? Muammo yo'qmi?
- Baxtiyor Ashurmatov juda yaxshi jamoani shakllantirdi. Shu bois hammamiz bitta oila bo'lib harakat qilyapmiz. Ichki muhit juda yaxshi. To'g'risi, hamma jamoada ham moliyaviy muammolar bor. Bizda ham bu borada muammolar bor-u, ammo u qadar jiddiy emas. Futbolchilarning ahil inoqligi muhim ahamiyatga ega. Doim maydonga tushayotganimizda pulni o'ylamay faqat muxlislarni quvontirish uchun o'ynayapmiz. Hozircha natijalarimiz chakki emas, 5-o'rinni egallab turibmiz. Eng muhimi, bizda ahil jamoa bor.

- “Neftchi”ga ham befarq emasmisiz? Jamoaning o'yinlari va natijalarini kuzatib turibsizmi?
- Albatta. “Neftchi”da ko'p yil o'ynaganim bois har bir uchrashuvdan keyin qanday o'ynagani va qanday natija ko'rsatgani bilan qiziqib turaman. “Neftchi”ga musobaqajadvalining pastki o'rinlarda yurish mutlaqo yarashmaydi.

- Klubda yuz bergan o'zgarishlarga qanday munosabatda bo'ldingiz?
- Odingilar haqida gapirishni xohlamayman. Hozir esa hammasi o'z o'rniga tushyapti. Futbolni tushunadigan insonlar kelib ishni boshlashdi. Umid qilamanki, bundan keyin hammasi yaxshi bo'ladi. Bu ishlarning samarasi o'laroq “Neftchi” dastlabki g'alabasini qo'lga kiritdi.

Mansur Saidov: “Navbahor”ni tanlaganimdan afsuslanmayman”