Bu gal ham toshkentliklar “Metallurg”ga qarshi yoshlar tarkibini qo'ydi.

Uchrashuv tajribali bekobodlik futbolchilarning ustunligi ostida boshlandi. Mahorat bobida ustun bo'lgan “Metallurg” birinchi taymda maydon markazini qo'ldan boy bermadi. Tayanch yarim himoyachilari qanotlar bo'ylab Murod Toshmatov, Ruslan Vagapov, Shohnazar Norbekovlarni tez tez hujumga chorlab turishdi. Bu esa o'z samarasini bermasdan qolmadi. Shunday hujumlarning birida “Bunyodkor” yoshlari to'pni qiyinchilik bilan maydon tashqarisiga chiqarib yuborishgandi. Burchakdan kiritib berilgan to'pni etiborsiz qoldirilgan Murod Toshmatov kuchli zarbasi bilan darvoza to'riga joylab qo'ydi.

Ikkinchi taymda bunyodkorchilar tezlikni oshirishdi. O'z navbatida “Metallurg” qarshi hujumlarda farqni oshirish uchun bir necha qulay imkoniyatlarga ega bo'ldi. Ammo futbolda sen urmasang, senga urishadi degan ibora bu gal ham o'z isbotini topdi. Mezbonlar hujumini bekobodliklar ikki marta jarima maydonchasida qoidaga xilof tarzda to'xtatishdi. Belgilangan ikkala penaltidan ham “Bunyodkor” unumli foydalanib, hisobda oldinga o'tib oldi. Ammo tajriba o'yin yakunida yana qo'l keldi. Avvaliga Murod Toshmatov dublini rasmiylashtirgan bo'lsa, o'yin tugashiga ikki daqiqa qolganda Dilmurod Karimov mezbonlarni uchinchi marta o'yinni maydon markazidan boshlashga majbur etdi.

“Metallurg” keyingi uchrashuvni ham “Bunyodkor”ga qarshi o'tkazadi. 24 yanvar kuni toshkentliklarning asosiy tarkibi bekobodliklarga qarshi o'z maydonida to'p suradi.

“Metallurg” bugungi o'yinni quyidagi tarkibda o'tkazdi:

Rahimjon Rahmonberdiev, Hikmat Hoshimov, Javlon Mirabdullaev, Mirg'iyos Sulaymonov, Aleksandr Kovalev, Doniyor Odilov, Said Abdujabborov, Ruslan Vagapov, Murodjon Toshmatov, Dilmurod Karimov, Shohnazar Norbekov.

Zahiradagilar:Temur To'ychiev, Mirto'ra Akbarov, Davron Karimqulov, Sunnat Ermatov, Zohid Abdullaev.

“Metallurg” – “Bunyodkor” (yoshlar) – 3:2