U “qaldirg'ochlar” safida jami 36ta uchrashuvda maydonga tushib, raqiblari darvozasini 22 bor aniq nishonga olishni uddalagandi. Ayni paytda Xitoy superligasining “Lyaonin Xuvin” klubi sharafini himoya qilayotgan Trifunovich “Bunyodkor” jamoasida o'tkazgan damlarini xotirladi.

- Milosh, O'zbekistonda o'tkazgan davringizni faoliyatingizdagi eng yorqin mavsum desa bo'ladimi?
- “Bunyodkor”da juda ajoyib kunlarni boshdan kechirdim. Umuman futbolchilik faoliyatimdagi eng sermahsul yil ham aynan O'zbekistonda o'tdi. Shu boisdan ham “Bunyodkor” futbol klubi men uchun qadrli bo'lib, xotiramda abadiy saqlangan.

- “Bunyodkor”ni tark etib, Xitoyda o'ynayotgangizga ham ikki yil bo'ldi. U paytda yurtimizda serbiyalik futbolchilar ko'pchilikni tashkil etishardi. Hozir esa unday emas. Aytingchi, yurtimizdagi futbolchilardan kimlar bilan aloqani saqlab qolgansiz?
- Ochig'ini aytsam, 2012 yilgi Osiyo Chempionlar ligasi paytida “Bunyodkor”ga ishqibozlik qildim. Jamoa yarim finalga etib borgan pallada o'zimga o'zim Xitoy klubiga o'tib xato qildimmikan, deb savollar ham bera boshladim. O'sha kezlarda “Bunyodkor” futbolchilari bilan ijtimoiy tarmoqlar orqali xabarlashib turardik. Hozir esa deyarli hech kim bilan gaplashmay qo'yganman.

- Hali ham gollaringizni “sovuq” ko'rinishda nishonlayapsizmi?
- Rostini aytsam, odatiy uchrashuvlarda gol ursam xursandchiligimni sezdirmayman. Lekin o'sha uchrashuvning ahamiyati baland bo'lsa yoki golimni nishonlash uchun qandaydir sabab topilsa albatta ko'rinishim o'zgaradi. Xitoyda ham shunga o'xshash savollarni ko'p berishadi.

- Yangi barpo etilgan, mamlakatimizdagi eng ulkan arena bo'lmish “Bunyodkor” stadioni haqida eshitdingizmi?
- Ha, stadion malumotlari va suratlari bilan internetda tanishib chiqdim. Shaxsan menga yoqdi. Juda ajoyib arena! Umid qilamanki, keyinchalik ushbu stadionda to'p tepish baxtiga muyassar bo'laman.

- Siz bilan yurtimizda ro'y bergan biron-bir qiziq voqelikni eslay olasizmi?
- Men uchun yurtingizdan qolgan muhim esdalik bu – “Bunyodkor” bilan chempionlikka erishganim va O'zbekistonning eng yaxshi to'purari bo'lganimdir. Ishoning, hamma futbolchida ham bunaqangi omadli mavsum bo'lavermaydi.

- “Bunyodkor”dan yana taklif tushsa rozi bo'larmidingiz?
- Ha, albatta.

Bahodir MIRZAEV suhbatlashdi.

Milosh Trifunovich: O'zbekistondan qolgan esdaliklar ko'p