G'uzorda qiyin uchrashuv o'tkazdik. Negaki, “Sho'rtan” ham o'ziga xos jamoa va buni ortiqcha izohlashga hojat yo'q. Shunday bo'lsa-da, chempionlik uchun kurash olib borayotgan jamoa sifatida raqibga ochko ulashishga haqqimiz yo'q edi. Afsuski, bugun o'zimiz uchun qimmatli bo'lgan ochkolarni boy berdik. Lekin oldimizda hali o'yinlar bor va biz navbatdagi uchrashuvlarda maksimal darajada harakat qilib boramiz.

-Bugun “Bunyodkor”ning g'alaba qozonishiga nima etishmadi?
-Eng birinchi galda tarkib va o'yin taktikasini tanlashda xato qildim. Keyin esa yigitlarni o'yinga yaxshi tayyorlay olmadim. Masalaning yana bir jihati shundaki, chempionlik uchun asosiy davogar bo'lgan “Bunyodkor”ga qarshi har qanday jamoa bir necha karra ortiqcha kuch bilan to'p surishga, qarshilik qilishga intiladi. Bugun biz “Sho'rtan” jamoasi misolida bu holatga yana bir bor guvoh bo'ldik.

-Ochko yo'qotilishi shogirdlaringiz kayfiyatiga qanchalik tarzda salbiy tasir ko'rsatishi mumkin?
-Avvalo o'tgan o'yinni tezroq unutishga harakat qilamiz. Hayot to'xtab qolmaydi. Yigitlarni kayfiyatini ko'targan holda navbatdagi uchrashuvlarga har doimgidek tayyorgarlikni susaytirmay olib boramiz. Oldimizda chempionatning “Navbahor”ga qarshi o'yini va mavsumning eng muhim bellashuvlaridan biri – mamlakat Kubogi uchun “Nasaf” bilan “to'qnashuvimiz” kutib turibdi. Bunga yigitlar bilan professional tarzda yondoshib, ish olib boramiz.

-Mutaxassis sifatida autsayderlar qatorida borayotgan bugungi raqib jamoaning holatini qanday baholaysiz. Nima deb o'ylaysiz “Sho'rtan” oliy ligada qolish masalasini ijobiy hal qila oladimi?
-Tashqaridan baho berish oson ish emas. Shunga qaramay “Sho'rtan”ning o'yini menga yoqdi. Tarkibda yaxshi futbolchilar borligi ko'rinib turibdi. Ammo jamoa so'nggi o'yinlarda qimmatli ochkolarni boy berib qo'ydi. Misol uchun o'z maydonida “Dinamo” bilan durang o'ynadi, “Navbahor” va safarda “Buxoro”ga mag'lub bo'ldi. Bunday holatda tezroq chiqib ketilsa va keyingi uchrashuvlarda bugungidek o'yin namoyish etilsa, “Sho'rtan” elitada qolish masalasini o'zi uchun ijobiy hal etishi, albatta mumkin.

Mirjalol Qosimov: "Tarkib va taktika tanlashda xato qildim"