Ҳафтада бир марта асакалик йигитлар марғилонликлар билан ўртоқлик учрашуви ўтказиб турар эканлар. Мен бугунги “Андижон”нинг қуйи ўринларда юришига кўникиб қолдим ва бундан ҳайратланмайман ҳам. Сабаби Андижонга ҳақиқатдан ҳам юракдан ёрдам бериши мумкин бўлган футболчилар, керакли мураббийнинг қўлига тушмаган ҳолда, бошқа ишлар билан машғул.

Кечаги ўйинни томоша қилар эканман, у ердаги шиддатни олий лигада кўрмаганимга анча бўлиб кетди. Икки жамоа сафида еттитадан футболчи, узунлиги 70 метр, дарвозаси 5 метр бўлган майдонда тўп тепдилар. Жами икки соат давом этган ўйинда 10 дақиқа таннафус бўлди. Катта футболда аут, бурчак тўпи, жарима зарбаси ва симуляцияларга кетадиган вақтни олиб ташласангиз, соф ўйин вақти 52-58 дақиқага этади. Кўпчилик ОЧЛ ўйинларида нима учун "60 дақиқа" ёзувидан фойдаланишаётганини тушунмаяпти. ОФК бу билан ўйиндаги соф ўйин дақиқасини 60 дақиқага етказишни режалаштирган.

Хуллас, бу ўйиндаги соф ўйин дақиқаси 80-85 дақиқага етди. Жисмонан бирортаси чарчаб қолгани йўқ. Кейин ўзим учун амин бўлдим, “Андижон” учун ўйнаши керак бўлганлар бозорда, бозорда савдо қилиши керак бўлганлар эса клубда экан.

Асака жамоасида тўп тепган икки футболчи 1987 йилда туғилган бўлиб, Вагиз Галиулин билан битта синфда таҳсил олган экан. Ўйинини кўрсангиз эди.

Худди шундай Марғилон жамоаси. Менга кўпроқ дарвозабонлари ёқди. Сўнгги пайтларда эмас, сўнгги йилларда "Нефтчи" жамоаси сафидан ўрин олиш учун "эриш" кераклигини айтишди.

Бизда футболни қачон ривожлантиришимиз мумкин, қачонки ўз вилоятига жонини берадиган футболчиларни жамоада сақлаб қола билиш орқалигина. Бу кундаликни икки жамоа ўйинини кўра туриб ёздим. Аслида ҳар бир вилоятимизнинг муаммоси шунда.

Нодирхўжа Юлдашев

Москва кундалиги, 8-кун. "Черкизово"да водий дербиси