Yoshligimizda gazeta sahifalarida "Neftchi" jamoasining uzog'ini yaqin qiladigan "Ikarus" rusumli avtobus suratiga tez-tez ko'zimiz tushardi. Avtobus o'z davrini o'tab bo'ldi degan o'yda edik, yo'q unaqa emas ekan.

"Ikarus" haliyam "Neftchi" xizmatida. Bir necha yillar davomida asosiy tarkib uchun xizmat qilgan bu avtobus hozirda "Neftchi" o'rinbosarlarini safar uchrashuvlariga eltmoqda. Qoyil qolsa arziydi.

U-21 chempionatining 7-turidan o'rin olgan "Neftchi" - "Lokomotiv" bahsiga farg'onaliklar mana shu avtobusda Qo'qon shahriga kelishdi. Haydovchi bilan gaplashganimda, "Ha, bu o'sha avtobus, Xudoga shukur haliyam yuribdi" dedi.

- Aka, avtobus olinganiga qancha bo'ldi? - qiziqib so'rayman men.

- 1995 yil birinchi Prezidentimiz Islom Karimovning Farg'ona viloyatiga tashrifi munosabati bilan jamoaga shu avtobus hadya qilingandi. Shundan beri xizmatda. Xudo xohlasa, shu voqeagayam 27 yil bo'ldi.

27 yillik avtobus! Bu orada "Neftchi" ne kunlarni boshdan kechirmadi, ne-ne joylarga borib o'ynab kelmadi. Mana shu avtobus jamoaning quvonchli va mahzun kunlarida birga bo'lgan, birga turgan va birga ko'rgan.

"Neftchi" avtobusi yodingizdami?