Bu paytda bobodehqonlar o'z hosillarini yig'ib olishadi. Aniqrog'i, g'alvir suvdan ko'tariladi. Eng asosiysi yurtimizning boyligi sanalmish paxta yig'im-terimi ham aynan mana shu faslga to'g'ri keladi. Sentyabr oyidan boshlab butun o'zbek halqi milliy boyligimiz hisoblanmish paxtani nest-nobud qilmasdan terib olish payida bo'ladi. Har bir O'zbekiston fuqarosi mana shu paxta mavsumida o'zining o'rnini dalada deb biladi.

Hashar faqat o'zbekistonliklarga xos odat. Hech bir davlatda bizdagi kabi bunday udumni topa olmaysiz. Paxta mavsumida esa halqimizning yakdil va ahil ekanligi yaqqol ko'zga tashlanadi. Elimizning farovonligini yo'lida tinmay mehnat qilayotgan halqimiz paxta mavsumida bir yoqadan bosh chiqargan holda dala tomon oshiqadi. Bizdagi bu holatni ko'rgan o'zga yurtdan kelgan kishi hayratda qolishi hech gap emas. Hozir hamma paxta yig'im terimi bilan band.

Viloyatimiz xirmoniga o'z hissasini qo'shishni maqsad qilgan va tashabbuskorlik ko'rsatgan “Neftchi” jamoasi vakillari ham 7 oktyabr kuni dala tomon yo'lga chiqishdi. Bundan maqsad oz bo'lsa-da, paxtakorlarga madad bo'lish edi. O'ylaymizki, maqsadimizga erishdik.

Dalaga kirib borar ekanmiz, oppoq libosga burkangan erlarni ko'rib, quvondik. Mana shunday ozod va obod vatanda yashayotganimizga shukronalar aytdik.

Paxta termida “Neftchi” PFKda xizmat qilayotgan bir qator xodimlar, futbolchilar Qo'shtepa tumanining paxta xirmoni yuksalishiga xissa qo'shish niyatida “Yangi hayot” qishloq fuqarolar yig'ini hududidagi “Erali Safarov fayzli eri” fermer xo'jaligida bo'ldilar.

Komiljon Mirzaboev - “Neftchi” professional futbol klubi raisi:
- Futbolchilarimizga 20 turdan keyin 4 kunlik tatil bergandik. Mana shu tatilning bir kunini dalada, paxta maydonida o'tkazishga qaror qildik. Mamlakatimiz paxta xirmoni yuksalishiga oz bo'lsa-da xissa qo'shsak, bundan mamnunmiz. Yigitlarimizning shijoati, qiziqishi yaxshi, terim surati ham yuqori. Futbolchilarimizning har biri tushlikkacha 40 kg dan paxta tergan bo'lsa, kun yakuniga qadar 100 kg ga etkazishni rejalashtirishyapti. To'g'risining aytsam, mening tashabbusimni barcha jamoadoshlarim mamnuniyat bilan qarshi olishgani meni quvontirdi.

Saidillo Rahmatov “Neftchi” futbolchisi – Terim juda qizg'in boshlandi. Yuqorida takidlagandek, barcha safdoshlarimiz juda katta qiziqish bilan paxta terishyapti. Har holda, maydonda koptok tepishning qanday gashti bo'lsa, dalada paxta terishning gashti ham bundan kam emas ekan. Toza havoda, dustlar bilan xangomalar aytib, keng joylarda ko'ngil yozish zavqiga hech narsa teng kelmas ekan. Yurtimiz paxta xirmonining baland ko'tarilishiga xissa qo'shayotganimizdan mamnunmiz va buni o'zimiz uchun sharaf deb bilamiz.

“Neftchi” PFK Matbuot xizmati

“Neftchi” PFK paxta terimiga chiqdi