Quyida intervyuning qisqacha ko'rinishini o'quvchilarga taqdim etamiz.

"Barcha ishlar bir maqsad sari yo'naltirilmadi. Ijobiylikdan ko'ra salbiylik ko'proq ko'zga tashlandi. "Neftchi" azolari o'ziga xos tarzda tushunarsiz futbol o'ynashda davom etdilar. Jamoa tepasiga kelgan mutaxassislar qanday darajada ekanliklarini ko'rsatib qo'yishdi.

Amet bilan o'zaro suhbatlashganimizda kamchiliklarini aytib, hozirgi kunda bunday futbol o'ynamasliklarini bayon etdim. Futbolchilarning imkoniyatlaridan 60-70%ga foydalanildi, xolos. Memetning hozirgi zamon futboliga bo'lgan qarashlari ancha eskirgan. Bu haqda klub rahbari Mirzaboevga ham aytgandim. Quloq solib ham qo'ymadi", - deya jamoaning o'yin uslubiga etiroz bildiradi Gubanov.

"Neftchi" qo'lga kiritgan g'alabalarni shubhaga olgan Gubanov shunday deydi:
- Jamoa oldiga 5-o'rinni olish vazifasi qo'yilgandi. Barcha yangi o'yinchilarni o'zlari taklif etishdi. Memetdan qaysi jihatlarga ko'proq etibor qaratayotganligini so'radim. Mutaxassis esa javob tarzida 2-3ta familiyani keltirib yanglishganligiga iqror bo'ldi. Jamoaning kelajagi haqida qayg'urilmadi. Shuningdek, oliy ligadagi ayrim "saxiy" jamoalardan minnatdor bo'lishlari kerak. Kamida 4ta uchrashuvda raqiblarning jiddiy qarshiligi kuzatilmadi. Buni stadionga kirgan ishqiboz ham bildi. Agar 4ta "saxiy" jamoaning "tortig'i" bo'lmaganida nima qilishardi? Qissadan hissa shuki, Memet boshchiligidagi murabbiylar shtabi yuksak vazifalarni bajarishga qodir emasliklarini ko'rsatib qo'yishdi.

Muallifning, "balki, o'zingiz murabbiy bo'lishni maqsad qilayotganingiz uchun shunday gaplarni aytayotgandirsiz?" degan savoliga mutaxassisning javobi quyidagicha bo'lgan:
- Yil boshida shunday taklif tushganida rad javobini bergan bo'lardim. Ancha vaqt chetda yurib nimagadir erishishimga ishonmasdim. Jamoaga qaytib voqealar rivojini kuzatgach, hech nima o'zgarmaganiga amin bo'lmoqdaman. Nima, harakat qilsam eplab ketishim mumkin.

"Hozir o'qib, murabbiylik licenziyasini qo'lga kiritishmoqda, ammo kalla bo'm-bo'sh. Klub tepasiga ko'proq shundaylarni jalb etishyapti", - deydi murabbiy.

Hozirgi murabbiylar shtabi kelasi mavsumda ham faoliyat olib borsa, "Neftchi"ning kuchli oltilikka arang kirishini bashorat qilgan Noil Gubanov, Sarkisyan davrida ham ichki holat yaxshi bo'lmaganligini aytgan. "Viloyat futbolini ipidan ignasigacha bilaman. Sarkisyan davrida bizga ishonch bildirilmagan. Farg'onadan boshqa joylardagina bizga ishlashga imkon bor edi. Qandaydir qog'ozdagi chalkashlikni bahona qilishib, 42 yoshimda hatto faxriylar tarkibida maydonga tushishimni ham taqiqlab qo'yishgan. Sarkisyan davridagidan ham ichki holat biroz yomonlashgan deb ayta olaman. Sarkisyan yoshi ulg'aygach, charchagani bilinib qolgandir. Hozirgi murabbiylarning darajasi bundan ortig'iga yaramaydi.

Noil Gubanov gapining so'nggida "Ushbu intervyudan keyin jamoada qola olmasligimni tushunib turibman", - deya fikrlarini tugatgan.

Abdulhafiz Abdulaziz o'g'li suhbatlashdi.

"Neftchi"da muammo bormi yoxud Gubanovning intervyusiga nazar