Unga ko'ra Bekobodda o'tadigan "Metallurg" - "Paxtakor" uchrashuviga Firdavs Norsafarov bosh hakam etib tayinlangan.

Qizig'i Norsafarov 3-turdan o'rin olgan "Paxtakor" - "Navbahor" uchrashuvida VAR hakami sifatida ishlagan va O'zbekiston futbol associaciyasi Hakamlar qo'mitasi qaroriga ko'ra, unga nisbatan Hakamlik intizom kodeksining 2.3 bo'limi 7-bandiga asosan Coca Cola Superligasida VAR hakami sifatida 4 tur uchrashuvlaridan chetlashtirish intizom chorasi qo'llanilgan (uchrashuv natijasiga tasir ko'rsatmagani uchun).

Reglament bo'yicha Norsafarov Superligada bosh hakam sifatida ishlashga to'la haqli. Sababi u xatoni VAR hakami sifatida qilgan va aynan VAR hakami sifatida 4ta turga chetlatilgan.

Lekin shaxsan menga g'alati tuyulgan holat Firdavs Norsafarovning yana aynan "Paxtakor" ishtirokidagi o'yinga tayinlangani bo'ldi. Deylik Norsafarov 4-turdan o'rin olgan istalgan boshqa bahsga tayinlanganida bu maqolani yozmasdim. Bu maqolani "Paxtakor" ishtirokidagi o'yin bo'lgani uchun ham yozayotganim yo'q. Norsafarov masalan "Bunyodkor", OKMK yoki "So'g'diyona" o'yinida ishlab xato qilib keyingi tur yana shu jamoalar ishtirokidagi o'yinga tayinlansa ham shuni yozardim. Yani bir hakam bir jamoa o'yinida xato qilgan va keyingi turning o'zida yana shu jamoa o'yiniga tayinlanmoqda. O'zi bizda kim yoki kimlar hakamlarni uchrashuvlarga tayinlaydi?

Tasavvur qiling ertaga "Metallurg" - "Paxtakor" uchrashuvini Norsafarov futbol qonun-qoidasi bo'yicha zo'r boshqarsa va aytaylik "Paxtakor" darvozasi tomon toza, 100 foizlik penaltini belgilasa ham baribir unga bosim bo'ladi. "Paxtakor" futbolchilari va muxlislar tomonidan. Norsafarov shu o'yinda o'z ishini to'g'ri qilib penalti belgilagan bo'lishi mumkin, lekin klubdagilar nazdida uning qarori noto'g'ri bo'lib tuyulaveradi. Bularning bariga sabab o'tgan turdagi bilib yoki bilmay qilgan xatosi bo'ladi.

Aslida gap Norsafarovda ham emas, gap uni mana shu o'yinga tayinlaganlarda. Biroz avval Alisher Nikimbaev ham o'z kanalida shu vaziyat bo'yicha fikr qoldirdi. Shunday gap-so'zlar bo'lishi mumkinligini tushunish va Norsafarovni boshqa o'yinga tayinlash uchun maktabda 11ta sinfni tugatishning o'zi etardi menimcha.

Misol uchun "Paxtakor" - "Navbahor" uchrashuvida AVAR (VAR yordamchisi) sifatida ishlagan va Hakamlik intizom kodeksining 2.3 bo'limi 7-bandiga asosan Coca Cola Superligasida VAR hakami sifatida 4 tur uchrashuvidan chetlashtirilgan Baxtiyorxo'ja Shavkatov 4-turdagi "Surxon" - "Buxoro" o'yinida qanot hakami sifatida ishlaydi. Shavkatov umuman boshqa jamoalar ishtirokidagi o'yinga AVAR hakami sifatida ishlab xato qildi va umuman boshqa jamoalar ishtirokidagi o'yinga qanot hakami sifatida tayinlandi. Mana bu men uchun ham reglament, ham insoniylik tomonidan normal holat. Agar bizda hozir bosh hakamlar etishmovchiligi bo'lsa va Norsafarovdan boshqa variant bo'lmasa kim uni aytaylik "Qizilqum" - "Nasaf", "Olimpik" - "Andijon" yoki "Bunyodkor" - "Turon" o'yiniga tayinlashga xalal berdi? G'alati.

P.S. Bu holat xususiy klinika tufayli vafot etgan inson haqidagi intervyu jarayonida boshqa xususiy klinika reklamasini qo'yishga o'xshaydi. Aslida taqiqlanmagan, lekin insoniylik jihatidan juda noto'g'ri.

Norsafarov va "Paxtakor". G'alati