“Қўқон-1912” клубининг мана шундай натижа кўрсатишида етакчи футболчимиз Носир Отақўзиевнинг ҳиссаси катта бўлди.

Мавсум поёнига етгач, клуб раҳбарияти 32-ёшли ҳужумчини “мавсумнинг энг яхши футболчиси” деб тан олишди.

Фурсатдан фойдаланиб, Носир Отақўзиев билан қисқача суҳбатда бўлдик.

– Носирбек, “Қўқон-1912” клуби раҳбарияти сизни мавсумнинг энг яхши футболчиси деб тан олишгани билан табриклаймиз.

– Табрик учун раҳмат. Бундай эътироф ҳар бир футболчи учун катта шараф.

– Якунига етган мавсум борасида қандай фикр билдира оласиз?

– Очиғини айтсам, жамоамиз осон бўлмаган мавсумни бошидан ўтказди. Биринчи даврада муваффақиятсизлик домида қолиб кетгандик. Чемпионатнинг иккинчи қисмида вазиятни ўнглаб, ўз олдимизга қўйилган вазифани бажара олдик.

Бу йилги мавсум ҳам олдинги каби шиддатли, бир-биридан қизиқарли баҳсларга бой бўлганини таъкидлаш жоиз.

– 2015 йилги мавсумда 9 та гол киритгандингиз. Якунига етган мавсумда эса кубок ўйинларни ҳисобласак (чемпионатда 7 та, кубокда 2 та) яна шунча голга муаллифлик қилдингиз. Мавсум бошида ўз олдингизга нечта гол киритишни мақсад қилиб қўйгандингиз?

– Ҳар бир ҳужумчи иложи борича кўпроқ гол киритишни мақсад қилади. Менинг ҳам мақсадим шундай. Насиб бўлса янги мавсумда рақиблар дарвозасига кўпроқ йўл топишга ҳаракат қиламан.

Лекин шуни унутмаслик лозимки, мен учун шахсий ютуқлар иккинчи даражада туради. Энг асосийси жамоамнинг муваффақиятидир. Футбол бу жамоавий ўйин. Тўғри, ҳужумчининг савияси урган голлари билан белгиланади. Аммо жамоа манфаати бирибир устун туриши лозим.

– Нўъмон Ҳасанов борасида нималар дея оласиз?

– Нўъмон Нурматович бош мураббий бўлиб келгач, жамоамиз ўйинида ўсиш бўлганини тан олиш лозим. Тўғри, яхши жамоани шакллантириш учун вақт керак бўлади. Аммо биз қисқа фурсат ичида кўзлаган мақсадга эришдик. Бунда албатта бош мураббийнинг ҳиссаси катта бўлди.

Нўъмон ака тартиб-интизомга жиддий эътибор берадиган мутахассислар тоифасига киради. У киши биринчи навбатда барчани бир оила сифатида бирлаштира олди.

Футболда ҳамма бир мақсад йўлида бирлашмас экан натижага эришиб бўлмайди.

Ўйлайманки, янги мавсумда жамоамиз янада яхши натижа кўрсатади.

– Қўқонлик футбол мухлислари мамлакатимизда етакчиларидан саналишади. Улар борасидаги фикрингизни билмоқчи эдик.

– Чиндан ҳам қўқонлик футбол ишқибозлари ўзгача. Мухлисларимиз ҳар бир ўйинда бизни қўллаб-қувватлаб туришгани футболчиларга қўшимча куч бағишлаганини айтиш жоиз. Улар жамоанинг оғир дамларида ҳам ёлғизлатиб қўйишмади. Биз футболчилар шундай ажойиб мухлисларимиз борлигидан фахрланамиз.

Ҳар доим уларни хурсанд қилиш учун бор кучимизни ишга солишга тайёрмиз.

Носир Отақўзиев: "Мухлисларимиз билан фахрланамиз"