Бунинг натижасида клуб жорий мавсум аутсайдерлар қаторига тушиб қолди. Кетма-кет омадсизликлардан сўнг, жамоа раҳбарлари бошқарув постига янги мурабббий олиб келиши борасида гаплар урчий бошлади.

Championat.asia бунга аниқлик киритиш мақсадида клуб раҳбари Облаёр Расуловга мурожаат қилди.

- Охирги пайтларда, “Шўртан”нинг олий лигада “жон сақлаб” қолиши сўроқ остида турибди. Боиси жамоанинг айни пайтда эгаллаб турган ўрнига хавас қилиб бўлмайди.

- Тўғри, бу йилги иштирокимиз мухлислар кутганидек бўлмаяпти. Лекин кучлилар сафида қолиш учун, қўлдан келган барча ишни қилмоқдамиз. Ва бу ҳаракатларимизни мавсум сўнггига қадар тўхтатиб қўймаймиз. “Бунёдкор” билан ўз майдонимизда кечган баҳсда дуранг қайд этдик. Қайсидир маънода пешқадамдан очко олиш ҳам қониқарли натижадир. Бу ўйинда ғалаба қозонишимиз ҳам мумкин эди. Йигитлар имкон қадар ҳаракат қилди.

- Мухлислар орасида “Шўртан”га янги мураббий келиши хусусида гаплар юрибди. Номзодларга эътибор қаратадиган бўлсак, уларнинг юртимизда ўз ўрнига эга эканлигини билиш мумкин. Бу қанчалик ҳақиқатга яқин?

- Йўқ, бу шунчаки миш-миш. Биз бу борада Зоир Тўрақуловга мавсум сўнггига қадар имконият берамиз. Ўйлайманки мураббий, вазифани бажариш учун, ўз ишига сидқидилдан ёндошади ва ишончни оқлайди.

- “Шўртан”нинг элитада қолиши учун яна қандайдир чоралар кўрилаётган бўлса керак?

- Албатта, жамоа юртимизда ўз ўрнига эга. Уни кучлилар сафида олиб қолиш учун барчасини қиляпмиз. Олдинда яна 8та ўйин турибди. Демоқчиманки, олий лигада қолиш учун имконият бор. Шундай экан мавсум поёнига қадар курашамиз.

Жаҳонгир Мирзо суҳбатлашди.

Облаёр Расулов: “Шўртан” бош мураббийни ўзгартирмоқчи эмас”