Маълумки, Дубай клуби вакиллари бразилиялик футболчи Вандерлейни ОЧЛда Осиё вакили (индонезиялик футболчи) сифатида рўйхатдан ўтказиб уни майдонга туширишганди.

Бу эса қонунга хилоф саналади. Шу боис ОФК тартиб-интизом қўмитаси мазкур ишни атрофлича ўрганиб чиқиб қуйидагича қарорга келди:

1. Футболчи Вандерлей уч ой майдонга туша олмайди;
2. У 10 минг АҚШ доллари миқдорида жаримага тортилди;
3. "Ал Наср" клубига 50 минг АҚШ доллари миқдорида жарима солинди;
4. "Ал Наср" бу мавсум ОЧЛда ишлаб топган барча мукофот пулларини ОФКга қайтариб беради (340 минг АҚШ доллари);
5. Клуб келаси йил ОЧЛга чиққан тақдирда ҳам ушбу мусобақада иштирок эта олмайди ("Ал Наср" ушбу мавсум якунларига кўра, ОЧЛ-2017га йўл ола билмаган, бу дегани 2018 йилги мусобақада ҳам қатнаша олмайди).

Маълумки, "Ал Наср" 24 август куни ўтказилган ОЧЛ доирасидаги "Ал Жайиш" билан биринчи ўйинда йирик ҳисобда ғалаба қозонган ва янги футболчи Вандерлей учта гол урганди. Ўшанда Вандерлей индонезиялик футболчи сифатида "Ал Наср" таркибида майдонга тушган, бу эса ОФКнинг легионерлар бўйича 3+1 лимитига ҳеч қандай "таъсир" ўтказмаганди.

Мана энди барибир жиноят жазосиз қолмади ва ташкилот БАА клуби ҳамда унинг футболчисини муносиб тарзда жазолади.

ОФК БААнинг "Ал Наср" клуби ва футболчи Вандерлейни жазолади