"Neftchi" safarda "Lokomotiv" bilan durang o'ynagan bo'lsa, "Olmaliq" o'z maydonida "Nasaf"ni mag'lub etdi. "Bunyodkor" esa Vohid Shodievning ikkita goli evaziga safarda "Qizilqum"ni engib qaytdi. Biz saytimiz odatiga binoan 2-tur ramziy terma jamoasini tuzib chiqdik. Albatta, qoldirilgan bitta o'yin borligini ham inobatga oldik, biroq "Qo'qon-1912" - "Paxtakor" bahsi qachon bo'ladi deb kutib o'tirsak, orada yana nechtadir tur o'tib ketishi turgan gap. Shu bois boshqa o'yinlarni kuzatgan holda ramziy jamoaga futbolchilarni saralab oldik.

DARVOZABON
Evgeniy Cheremisin ("Neftchi")

HIMOYACHILAR
Umar Eshmurodov ("Sho'rtan")
Islom Inomov ("Olmaliq")
Nemanya Yanichich ("Lokomotiv")
Oybek Nurboev ("Neftchi")

YARIM HIMOYACHILAR
Azim Ahmedov ("Navbahor")
Alisher Ziyovuddinov ("Metallurg")
Nikolay Chipev ("Dinamo")
Shavkat Salomov ("Olmaliq")

HUJUMCHILAR
Vladislav Ivanov ("Mashal")
Vohid Shodiev ("Bunyodkor")

Bosh murabbiy: Rustam Mirsodiqov ("Metallurg")

Darvozaga hech ikkilanmay "Neftchi" posboni Evgeniy Cheremisinni qo'ydik. Chunki rossiyalik posbon "Lokomotiv" bilan kechgan bahsda ancha ishonchli harakat qildi. U bir nechta vaziyatlarda o'z darvozasini muqarrar goldan saqlab qoldi.

Himoyachilardan Umar Eshmurodov, Islom Inomov, Nemanya Yanichich, Oybek Nurboev kabilar ramziy termaga kiritildi. Umar Eshmurodov yosh bo'lishiga qaramay, allaqachon "Sho'rtan"da o'z o'yinini topib keta oldi. Islom Inomov esa "Nasaf" bilan kechgan uchrashuvda yaxshi harakat qildi. Shuningdek, "Lokomotiv" - "Neftchi" bahsida har ikki jamoa himoyachilari - Nemanya Yanichich bilan Oybek Nurboev boshqalarga nisbatan birmuncha yaxshi o'yin ko'rsatishdi.

Bu tur yarim himoyachilardan Azim Ahmedov chiroyli gol urishga muvaffaq bo'ldi. "Metallurg" vakili Alisher Ziyovuddinov "Navbahor" bilan o'yinda o'zini ko'rsatdi. Qolaversa, u ham to'p kiritishning uddasidan chiqdi. "Dinamo"ning bolgariyalik legioneri Nikolay Chipev tez orada jamoasining eng yaxshi o'yinchilaridan biriga aylansa ajab emas. Yangi mavsum arafasida "Olmaliq"qa kelib qo'shilgan Shavkat Salomov yana tilga tusha boshladi. U "Nasaf" bilan kechgan bahsda yaxshi harakat qildi.

"Mashal"ning legioner hujumchisi Vladislav Ivanov ketma-ket ikkinchi turda ham gol kiritdi. U avvaliga "Navbahor", mana endi "Andijon" darvozasini ishg'ol qildi. Vohid Shodiev esa bu turda dublga erishdi. Shodiev "Bunyodkor"ga o'zining sobiq jamoasi ustidan g'alaba qozonishga munosib yordam berdi.

Saytimiz xodimlari bilan o'zaro maslahatlashgan holda ramziy terma jamoaga bosh murabbiy etib Rustam Mirsodiqovni tanladik. Negaki "Metallurg" 1-turda "Lokomotiv"ni qimmatli ikki ochkodan mahrum qilgandi, bu safar "Navbahor" maydonida durangga erishdi. Bundan ko'rinib turibdiki, Rustam Mirsodiqov jamoani mavsumga yaxshi tayyorlagan.

Oliy liga. 2-tur ramziy terma jamoasi