Garchi Ahrol Inoyatov "Futbol sharhi"da chiqish qilib, bizda kelishilgan o'yinlar yo'q, bor bo'lsa isbotlab beringlar degan bo'lsa-da, bunday o'yinlar borligiga hech kim ko'z yuma olmaydi. Agar yo'q bo'lganida, unga qarshi kurashish qo'mitasi tuzilmagan bo'lardi. "Bir balosi bo'lmasa, shudgorda quyruq na qilur" deganlaridek, o'zbek futboliga bir gap bo'lganki, shunday qo'mita tashkil qilindi.

Bu yildan etiboran oliy liganing har bir klubi vakillari "Kelishilgan o'yinlarga qarshi kurashish" qo'mitasi tomonidan berilgan maxsus bayonnomani to'ldirib chiqishadi. Bir varaq qog'ozdan iborat "Haqqoniylik bayonnomasi" uch tilda (o'zbek, rus va ingliz) klublarga tarqatildi. Uni futbolchi va murabbiylar to'ldirib berishadi. Shuningdek, hakamlar va nazoratchilar ham imzo qo'ygan holda topshirishadi.

Haqqoniylik bayonnomasiga imzo chekkan futbolchi/murabbiy/hakam/yordamchi hakam/nazoratchi va futbolga aloqador masul shaxs quyidagi shartlarga rozi ekanligini tasdiqlaydi:

- Futbolga aloqador hech qanday totalizatorga, jumladan pul tikish, pul tikishga aloqador bo'lish yoki boshqa shaxslarning pul tikishiga yordam berish holatlariga aralashmaslik;

- O'yin natijasiga noqonuniy tasir o'tkazish holatlari (pora berish yoki pora berishga harakat qilish va pora so'rash) bilan aloqador hech qanday harakatni etibordan chetda qoldirmaslik;

- Xizmat axboroti xavfsizligini va konfidencialligini taminlash;

- Sport qonun-qoidalariga yoki ushbu bayonnomaga imzo chekkan shaxs uchun aloqador barcha qonunchilik hujjatlariga qarshi boradigan yoki qarshi borishi mumkin bo'lgan xatti-harakatlar haqida darhol xabar berish;

- FIFA ustavi, OFK ustavi, O'FF reglamenti, O'FF ekspertlar Kengashi va ularda ko'rsatilgan barcha hukmlar va bayonnomada ko'rsatilgan barcha bandlarga rozi ekanini quyida imzosi bilan tasdiqlash.

Ism-familiya:
Imzo:
Sana:
Muhr:

Axborotlarni qabul qiluvchi masul shaxs: Inoyatov Ahrol Inoyatovich

Eslatma:
1. O'yin natijasiga tasir o'tkazish bilan aloqador malumotlar yoki shu maqsaddagi har qanday xatti-harakat haqida xabar beruvchining shaxsiyati bilan bog'liq malumotlar sir saqlanishi kafolatlangan;

2. Mazkur bayonnomaga imzo chekmagan va bu borada darhol xabar berish majburiyatini tasdiqlamagan futbolchilar, murabbiylar, klub rahbariyati, hakamlar, nazoratchilar, O'zPFL vakillari O'zbekistonda futbol bo'yicha rasmiy tadbirlarga kiritilmaydilar.

Oliy liga oldidan. "Haqqoniylik bayonnomasi" haqida eshitganmisiz?