Olimpiyachilarimizning dastlabki mashg'ulotiga tashrif buyurib, jamoa tarkibida bir qator yangiliklar bo'lganiga guvoh bo'ldik.

1. Darvozabonlar murabbiyi almashdi

Shu kungacha "Olimpik" golkiperlarini shug'ullantirib kelgan Timur Ganiev Amerika Qo'shma Shtatlariga ko'chib ketdi. Endi uning vazifasini uzoq yillar Toshkentning "Paxtakor" klubida faoliyat yuritgan Anvar Tursunovich Rashidov davom ettiradi. 61 yoshli mutaxassis ayni paytda olimpiya terma jamoamiz kiperlari uchun ham javob beradi.

Takidlash kerakki, o'tgan yil oxirida butsalarini mixga ilgan Shavkat Mullajonov oldinroq Timur Kapadzening shtabiga qo'shilgan edi.

2. "Neftchi"ga 2 kishi

"Jar" stadionining zaxira maydonida o'tgan mashg'ulotlarda Sardorbek Mahmudov va Xumoyun Sherbo'taev ko'rinish bermadi. Mazkur futbolchilar avvalroq Toshkentda yig'in o'tkazayotgan "Neftchi" tarkibiga qo'shilishgan edi.

3. AGMK Eldorni qaytardi

Olmaliq jamoasi mavsumning dastlabki qismida 14 ta (chempionlik kurashidagi raqiblar esa 2 marta kamroq) to'p o'tkazib yubordi. O'z-o'zidan Mirjalol Qosimov mudofaa chizig'ini mustahkamlash haqida o'ylayapti. AGMK rahbariyati birinchi navbatda bu mavsum ajoyib o'yin ko'rsatayotgan, Osiyo kubogida nimalarga qodirligini yana bir marta isbotlagan Eldor Begimovni Olmaliqqa qaytardi.

Malumot uchun, himoyaning istalgan nuqtasida o'ynay oladigan Begimovning transfer huquqi aynan AGMKga tegishli. U "Olimpik"da ijara shartnomasi asosida o'ynayotgan edi.

4. Yarim himoyachilar Bekobodga

Kapadze jamoasini yana 2 nafar futbolchi tark etgan. "Olimpik" asosiy tarkibidan muqim o'rin ololmagan Bektemir Abdumannonov va Davron Anvarov 2-davrada "Metallurg" sharafini himoya qiladi.

"Olimpik" tarkibida yana bir qancha o'zgarishlar bo'lishi kutilyapti. Faqat bu Dukent (Angren)da o'tadigan 5 kunlik yig'indan keyin malum bo'ladi.

obuna bo'ling → "Futbol analizi"

"Olimpik"dagi o'zgarishlar. 5 nafar futbolchi ketdi