O'yin zamonaviy va ko'rkam “Bunyodkor” stadionida bo'lib o'tadi.

“Jar” stadionida o'tkazilgan to'rt kunlik mashg'ulotlardan so'ng terma jamoamizning bugungi mashg'uloti o'yin bo'lib o'tadigan “Bunyodkor” stadioniga ko'chirildi. Mashg'ulotda BAA bilan o'yinga chaqirilgan barcha futbolchilar ishtirok etishdi, birgina Anzur Ismoilovni hisobga olmaganda. Malumki, Anzur hozircha Xitoyda va klubi uni qo'yib yuborishni istamayapti. Gap-so'zlarga qaraganda, Ismoilov ertaga kelishi mumkin ekan.

Bugungi mashg'ulot ham odatdagidek bir soat davom etdi. Chigalyozdi mashqlardan so'ng jiddiy mashg'ulotlarga o'tildi. Eng avvalo futbolchilar o'yin paytida bir-birlarini tushunib olishlari uchun keng maydon bo'ylab taktik usulda harakat qilishdi. Bunda o'yinchilar ikki jamoaga bo'linishdi:

“Qizillar”: Igor Sergeev, Server Jeparov, Vitaliy Denisov, Jasur Hasanov, Vohid Shodiev, Aziz Haydarov, Islom To'xtaxo'jaev, Odil Ahmedov, Shavkat Mullajonov, Sanjar Tursunov.

“Yashillar”: Dilshod Jo'raev, Jamshid Iskanderov, Vladimir Kozak, Fozil Musaev, Bahodir Nasimov, Akmal Shorahmedov, Sardor Rashidov, Ivan Nagaev, Davron Hoshimov.

Shuningdek, katta murabbiy Shuhrat Maqsudov ham vaqti-vaqti bilan “yashillar”ga yordam berib turibdi. Taktik uslubda harakatlanish yakuniga etgach, futbolchilar burchak va jarima to'plarini amalga oshirish ustida ishlashdi. Bunda bosh murabbiy Mirjalol Qosimov ko'proq “qizillar”ga turli ko'rsatmalarni berib turdi.

Standart vaziyatlarning deyarli barchasida to'p yoniga Server Jeparov keldi. Raqib darvozasi tomon hujum vaqtida Islom To'xtaxo'jaev, Vohid Shodiev, Shavkat Mullajonov, Igor Sergeev va Sanjar Tursunov standart vaziyatlardan gol urishga harakat qilishdi.

Qolgan futbolchilar bilan esa Shuhrat Maqsudov ishladi. Darvozabonlarni odatdagidek Pyotr Gizimchuk shug'ullantirdi. Mashg'ulot oxirida futbolchilar maydonning yarim qismida ikkiga bo'linib futbol o'ynashdi.

Xayrulla Xoliqov.

Osiyo Kubogi-2015. MTJ mashg'uloti (5-kun)