Ushbu o'yin O'zbekiston hamda Eron terma jamoalari o'rtasidagi oltinchi uchrashuv bo'ladi.

Bugunga qadar bu jamoalar turli musobaqalar hamda o'rtoqlik o'yinlari doirasida besh bora to'qnash kelishgan.

Bu o'yinlardan uchtasida Eron terma jamoasi ustun kelgan bo'lsa, bir bora O'zbekiston g'alabaga erishgan. Bir uchrashuv esa durang bilan nixoyasiga etgan.

Jamoalarning o'zaro o'yinlari doirasida qayd etilgan eng yirik hisob - 4:0. Aynan shu hisobda eronliklar Bangkokda bo'lib o'tgan XIII Osiyo o'yinlari chorak finalida g'alabaga erishgan.

O'zbekistonning Eron ustidan bugunga qadar qozongan yagona g'alabasi Jahon Chempionati-2014 saralash o'yinlari doirasida Tehronda bo'lib o'tgan uchrashuvda yuz bergan. Ulug'bek Baqoevning goli ushbu o'yinda O'zbekistonga g'alaba keltirgan edi.

Tarkibga etibor qaratsak, unda jiddiy jarohatidan so'ng tiklanib, yana yuqori darajadagi o'yinlarini namoyish eta boshlagan Shohrux Gadoev yana milliy terma jamoasidan chaqiruv olganini, shuningdek, ushbu mavsumda o'zini yorqin namoyon etib kelayotgan yosh futbolchi Ikrom Aliboev ham mamlakatning asosiy terma jamoasi safiga chorlanganini alohida takidlash mumkin.

O'zbekiston – Eron o'rtasidagi o'rtoqlik o'yini, “Bunyodkor” stadionida, 11 iyun kuni, soat 18:00da boshlanadi. O'yin uchun chiqarilgan chiptalar stadion kassalarida sotilmoqda. SIP toifali chiptalar narxi 30 000 so'mdan, qolgan barcha chiptalar esa 13 000 so'mdan.

O'zbekiston – Eron uchrashuviga prevyu