“Қизилқум” ПФК қошидаги болалар ва ўсмирлар футбол мактаби ўйингоҳида ташкил этилган мусобақада “Қизилқум” (фахрийлар), “Кимёгар” (НавоийАзот), “3-автобаза” ҳамда мезбонларнинг “Қизилқум-БЎФМ” жамоалари ғолиблик учун майдонга тушдилар.

Чинакам спорт байрами тусини олган мусобақада бош соврин “Қизилқум” ПФК вакилларига насиб этди. Фахрли иккинчи ва учинчи ўринларни “Кимёгар” ва “3-автобаза” жамоалари эгаллади.

Мусобақа якунида ғолиб ва совриндорларга махсус диплом ва совринлар топширилди.

Эътиборлиси, мусобақа ташкилотчилар томонидан “Кексаларни эъзозлаш йили” муносабати билан турли йилларда Навоий футболи тараққиётига ўз ҳиссаларини қўшган йигирма нафардан зиёд фахрийларга махсус қимматбаҳо совғалар тақдим этди.

—Ажойиб тадбирни ташкил қилгани учун “Қизилқум” ПФК маъмуриятиuf ўз миннатдорчилигимизни билдирамиз, — дейди футбол фахрийси Павел Архипов. — Турнир баҳонасида анчадан бери кўришмай юрган ҳамкасблар ва бошқа дўстлар билан яна дийдорлашдик. Ўз вақтида бирга тўп тепган, биргаликда фаолият кўрсатган марҳум дўстларимизни эсладик. Муҳими, эътибордан бошимиз кўкка етди.

Тадбир якунида турнир қатнашчилари ва фахрийлар ўзига хос байрам дастурхонига таклиф қилиндилар.

“Қизилқум”. Фахрийлар доимо эъзозда