"Real" - "Bavariya" eng dahshatli to'qnashuv. Menimcha, bundanda zo'r yoki qiziqarliroq to'qnashuvni qidirib topish qiyin. Bu jamoalar o'rtasidagi ko'plab o'yinlarni eslang, har biri o'zgacha kechgan. Hech bir o'yin muxlislarni zeriktirib qo'ymagan. Bugun ham shunday bo'lishiga shubha yo'q. "Real" hozirgi paytda o'zining eng yaxshi sport formasida desak bo'ladi. Jamoa mavsumdagi ilk sovrinni ham yutishga ulgurdi.

Ishtaha ovqat paytida kelishini yaxshi bilamiz. Lekin "Bavariya" ham ancha ishtahasi yuqori jamoa hisoblanadi. Myunxen klubi o'yinida biroz salbiy o'zgarishlar ko'zga tashlanmoqda. "Real"da esa aksincha. Ammo bu bugungi o'yingacha bo'lgan holatlar. Natijalar borasida ham imkoniyatlar deyarli teng. "Bavariya" futbolchilari sovrinlarni qo'lga kiritishdan zerikib qolmadik, biz yana kurashamiz va yangi sovrinlarni yutmoqchimiz deyishmoqda. "Real" futbolchilari esa xalqaro maydondagi yutuqlarga juda tashna holatdalar.

Bu o'yinda hech kimning imkoniyati yuqori ham emas. Yoki qaysidir jamoaniki pas ham emas. Odatda ikki o'yinlik to'qnashuvda kim maydonda zo'rligini isbotlay olsa, o'sha jamoa yutadi. Bu borada "Real" "Bavariya" uchun osonroq va kerakli raqib. Sababi, "Bavariya" nisbatan kuchsizroq futbol namoyish etadigan klublarga qarshi bor kuchi bilan o'ynolmaydi. Ularga etarli motivaciya etishmay qoladi. Buni Devid Moyesning sobiq jamoasiga qarshi o'yinda ham ko'rdik. Ularga gol kerak bo'lgan vaqtda esa, tezda gollar yog'dirib tashlay olishdi. "Real" esa ayni paytda juda kuchli futbol namoyish etmoqda. Ularning tarkibida yulduzlar va o'ta kuchli ijrochilar jamlanishgan.

"Bavariya" uchrashuv avvalidan biladi, qanday va qay tarzda harakat qilishni. Ularga so'nggi o'yinlarda etishmay qolayotgan motivaciya va ishtiyoq aynan bugungi "Real"ga qarshi o'yinda qayta uyg'onishiga shubha yo'q. Ronaldo va Beyl madridliklarning asosiy quroli. Ronaldo nemislar uchun eski tanish. Unga qarshi Lam va Boateng qanday qilib o'ynashni suv qilib ichib yuborishgan. Garet Beyl esa boshqa masala. Menimcha, bugungi o'yinda shu futbolchini Alaba zararsizlantira olsa, unda marra "Bavariya"niki. Imkoniyatlar har doim teng bo'lgan. Shaxsiy fikrimcha, bugun maydon egalari "Bavariya"ni dog'da qoldira olishmaydi. "Bavariya"ning qanotlari, yani "Robberi"ning o'yini qovushsa, unda Madrid jamoasini omadgina mag'lubiyatdan qutqarib qolishi mumkin bo'ladi.

Yana shuni aytish kerakki, agarda uchrashuvda tezkor gol kiritilsa, qaysi jamoa urishini farqi yo'q. O'yin yanada go'zallashadi va jamoalardan ochiq futbol ko'ramiz. Muxlislar esa haqiqiy futbol zavqini his etishadi. "Real" juda kuchli raqib. Zo'r o'ynaydi. Lekin "Bavariya" bilan o'yinda buni isbotlashi har doim qiyinlashib qoladi. "Bavariya"ga aynan "Real"dek raqiblar kerak. Buni o'tgan yilgi "Barselona" misolida ham ko'rgandik. Qiziqarli va tomoshabop futbol bo'ladi. Madridda triller bo'ladi. Kim aslida "killer" bo'lishini esa maydondagi jang ko'rsatib beradi. Kuchli jamoa o'z kuchini ko'rsatsin va haqlisi g'alaba qozonaversin.

Shahboz Beg'amov: "Real" "Bavariya" uchun oson va kerakli raqib"