Futbolchi Malayziya Superligasi ishtirokchisi "Kuching Siti" bilan shartnoma imzoladi. Shundan keyin u saytimiz uchun fikrlarini bildirdi.

- Sirojiddin, "Kuching Siti" varianti qay tariqa yuzaga keldi?

- Bu klubning yuzaga kelishida "Mashal" klubi bosh direktori Ilhom aka Qurbonovning hissalari katta bo'ldi. Aynan u inson "Mashal"da ishlagan agentga meni tavsiya qilgan. Keyinchalik o'sha agent "Kuching" variantini topdi. Shu o'rinda Ilhom akaga minnatdorchilik bildiraman.

- Bu qarorga birdaniga keldingizmi?

- Yo'q, albatta. Taklif borasida o'ylab ko'rdim. Otam bilan maslahatlashdim. Keyin "Neftchi" safida ikkinchi davrada kam o'yin amaliyotiga ega bo'ldim. Shu jihatlari ham "Kuching Siti" taklifini qabul qilishimga asosiy turtki bo'ldi.

- 2022 yilgi mavsum "Neftchi"da o'tkazgan faoliyatingiz sizda qanday taassurot qoldirdi?

- Yaxshi bo'ldi. Yomon o'tdi deya olmayman, chunki futbolchi sifatida o'sishga erishdim. Jamoa muxlislari meni hurmat qilishdi, qo'llab-quvvatlashdi. "Neftchi"da o'tkazgan o'yinlarim sabab hozirda legionerga aylandim. Kamchiliklar ham bo'ldi, lekin ularni bartaraf etishga urinaman. Bir so'z bilan aytganda, "Neftchi"dagi faoliyatimdan qoniqish hosil qildim. Yangi mavsumda farg'onaliklarga omad tilayman.

- "Kuching Siti"ni tanlashingizga “Neftchi” ustozining munosabati qanday bo'ldi?

- To'g'risi, bosh murabbiy qarorimni qo'llab-quvvatladi. Xorijdan taklif bo'lgani uchun ham o'zimni ko'rsatishim kerakligini takidladi. Buning uchun bosh murabbiyga minnatdorchilik bildiraman.

Sirojiddin Qo'ziev: "Neftchi"dagi faoliyatim yaxshi o'tdi"