Keskin va yuqori tempda kechgan uchrashuvda jamoalar 2:2 hisobidagi durang natijaga rozi bo'lishdi. Gollarga boy o'tgan o'yindan so'ng muborakliklarning mahoratli futbolchisi Sirojiddin Rahmatullaev fikrlarini bildirib o'tdi.

"Ikki jamoa ham yaxshi o'yin o'tkazdi. Bahsga qisqa vaqt mobaynida etarli darajada tayyorgarlik ko'rgandik. Nazariy mashg'ulotlarda "Surxon" jamoasining o'yinlarini o'rganib chiqdik. Ikkinchi bo'limda hisobda oldinda borayotib bo'shashdik. Kamchiliklarimiz ko'rinib qoldi. Yani vaziyatlarni yakunlashda shoshilmoqdamiz. Mashg'ulotlarda bu borada yanada qattiq ishlaymiz. Bizni keyingi turda "Nasaf"ga qarshi og'ir o'yin kutib turibdi. "Surxon" jamoasi standart vaziyatlardan yaxshi samara chiqara olishini bilardik. Chunki, ularning safida ajoyib ijrochilar bor. Afsuski, hisobni ushlab qola olmadik. Aleksandr Kasyan va Husniddin G'ofurovlar tezkorligi bilan har qanday jamoaga muammo tug'dira oladi. Bugungi bahsda ularni diqqat bilan qo'riqlashimiz kerak edi. Ular qarshi hujumda tajovvuzkor harakat qiladi. Ayni paytda barcha jamoalarning darajasi tenglashgan. Bu esa bellashuvlarni murosasiz kechishini taminlaydi",- deydi Sirojiddin Rahmatullaev.

Sirojiddin Rahmatullaev: "Vaziyatlarni gol bilan yakunlashda shoshmoqdamiz"