Кескин ва юқори темпда кечган учрашувда жамоалар 2:2 ҳисобидаги дуранг натижага рози бўлишди. Голларга бой ўтган ўйиндан сўнг муборакликларнинг маҳоратли футболчиси Сирожиддин Раҳматуллаев фикрларини билдириб ўтди.

"Икки жамоа ҳам яхши ўйин ўтказди. Баҳсга қисқа вақт мобайнида етарли даражада тайёргарлик кўргандик. Назарий машғулотларда "Сурхон" жамоасининг ўйинларини ўрганиб чиқдик. Иккинчи бўлимда ҳисобда олдинда бораётиб бўшашдик. Камчиликларимиз кўриниб қолди. Яъни вазиятларни якунлашда шошилмоқдамиз. Машғулотларда бу борада янада қаттиқ ишлаймиз. Бизни кейинги турда "Насаф"га қарши оғир ўйин кутиб турибди. "Сурхон" жамоаси стандарт вазиятлардан яхши самара чиқара олишини билардик. Чунки, уларнинг сафида ажойиб ижрочилар бор. Афсуски, ҳисобни ушлаб қола олмадик. Александр Касьян ва Ҳусниддин Ғофуровлар тезкорлиги билан ҳар қандай жамоага муаммо туғдира олади. Бугунги баҳсда уларни диққат билан қўриқлашимиз керак эди. Улар қарши ҳужумда тажоввузкор ҳаракат қилади. Айни пайтда барча жамоаларнинг даражаси тенглашган. Бу эса беллашувларни муросасиз кечишини таъминлайди",- дейди Сирожиддин Раҳматуллаев.

Сирожиддин Раҳматуллаев: "Вазиятларни гол билан якунлашда шошмоқдамиз"