Xabaringiz bo'lsa kerak, Ummon terma jamoasini 2011 yilning yozidan beri franciyalik murabbiy Pol Le Guen boshqarmoqda. Quyida ushbu mutaxassis haqida malumot berishni lozim topdik.

Pol Le Guen 1964 yilning 1 martida tug'ilgan. Uni ko'pchilik “Lion”da ishlagan paytlaridan biladi. Chunki bu murabbiy “Lion” bilan ketma-ket uch marta Franciya chempionligini qo'lga kiritgan (2003, 2004, 2005 yillarda). Bundan tashqari, Ummonga kelgunga qadar “Glazgo Reynjers” va PSJ klublarini boshqardi, shuningdek, Kamerun terma jamoasida ishladi.

O'yinchilik faoliyati
Pol Le Guen dastlab “Stad Brest”da olti yil to'p tepdi. Keyin ikki yil “Nant”da faoliyat olib borgach, 1991 yildan 1998 yilgacha PSJ safida harakat qildi va futbolchilik faoliyatini aynan shu klubda tugatdi. Futbolchi paytida Le Guen jami 478ta o'yinda maydonga tushib, 23ta gol urgan. 1996 yil PSJ bilan Kubok egalari Kubogini qo'lga kiritgan.

Himoya chizizg'ida to'p surgan Pol Le Guen Franciya terma jamoasida 17 marta maydonga tushib, bitta gol urgan. U hozirgacha terma jamoada Erik Kantona, David Jinola kabi futbolchilar bilan birga to'p surganidan faxrlanib yuradi. Sobiq futbolchi 1998 yilning 21 mayida o'tkazilgan Franciya va Kamerun o'rtasidagi o'rtoqlik uchrashuvidan so'ng butsalarini mixga iladi.

Murabbiylik faoliyati
Pol Le Guenning murabbiylikdagi ilk ish joyi “Renn” futbol klubi bo'ldi. U uch yillik faoliyati mobaynida Shabani Nonda, El Xoji Diuf kabi o'yinchilarni kashf qildi. Yosh murabbiyning ishini diqqat bilan kuzatib yurgan “Lion” rahbarlari Le Guen ishdan bo'shashi bilanoq darhol taklif bilan chiqishdi. Va shu tariqa Pol Le Guen “Lion” klubini qabul qilib oldi.

Shuni aytish lozim, boshida yangi murabbiy uchun oson bo'lmadi. Chunki “Lion” to'qqizta o'yindan atigi uchtasida g'alaba qozongani uchun muxlislar darg'azab bo'lishdi. Ammo Pol Le Guen g'alabalarga birdaniga erishib bo'lmasligini ohista tushuntirib, buning uchun vaqt kerakligini aytdi. Berilgan imkoniyat o'zini oqlab, “Lion” yakunda Franciya chempioni bo'ldi, bundan tashqari Evropa chempionlar ligasida chorak finalga qadar etib bordi.

Yosh mutaxassis “Lion”da 2002 yildan 2005 yilning 9 mayiga qadar ishladi. Keyin esa o'rnini Jerar Ulega bo'shatib berdi. “Lion”ni tark etgach, Le Guen biroz tanaffus olishga qaror qildi. U bir yil davomida hech qaerda ishlamadi va buning o'rniga “Lacio”, “Benfika” klublarida malaka oshirdi.

2006 yilning martidan esa u “Glazgo Reynjers”ni qabul qilib oldi va uch yillik shartnomaga imzo chekdi. Ammo boshlanishi juda xunuk ko'rinish oldi. Jamoa yangi murabbiy boshchiligida dastlabki o'nta o'yinning faqat ikkitasida g'alaba qozondi. Shunga qaramay, francuz ishlashda davom etdi, biroq Shotlandiyadagi faoliyati uzoqqa cho'zilmadi. 2007 yilning 4 yanvarida Le Guen ishdan bo'shash uchun ariza yozdi.

Shundan so'ng vataniga qaytgan murabbiy tez orada yangi ish topdi. Unga PSJni boshqarishni taklif qilishdi. Gay Lyakombning o'rniga tayinlangan murabbiy tez orada PSJni yuqori o'rinlar sari ko'tardi. 2008 yil Le Guen PSJ bilan Francyai Kubogini qo'lga kiritdi.

Ammo vaqt o'tgan sari u klubdagi ishlardan zerika boshladi chog'i, terma jamoada ishlashni maqul ko'rdi. Natijada 2009 yilning iyulidan Kamerun termasida faoliyat olib bordi. Le Guen Kamerunni JCH-2010ga olib bordi, bundan tashqari faxriy himoyachi Rigober Songni yana terma jamoaga qaytardi. Samuel Eto’Oni esa yangi sardor etib tayinladi. Kamerun jahon chempionatidagi ishtirokini tugatgach, murabbiy o'z lavozimidan ketdi va yana bir yil tanaffus oldi. Oradan bir yil o'tib esa Ummon terma jamoasining bosh murabbiyi etib tayinlandi.

Pol Le Guenning salkam uch yildan beri Osiyoda ishlab kelayotgani alohida mavzu. Bu haqda saytimiz orqali keyinroq to'xtalamiz.

Xayrulla Xoliqov.

Tanishing: Ummon terma jamoasi bosh murabbiyi - Pol Le Guen