Bugun O'zbekiston terma jamoasida o'yin o'tkazish bo'yicha beshinchi o'rinda turgan yarim himoyachi Mirjalol Qosimov haqida malumotlar beramiz. Ayni paytda O'zbekiston terma jamoasini boshqarayotgan murabbiy bugunga qadar 67 marta milliy terma jamoa libosini kiygan.

Qosimov 67ta o'yinning 38tasida to'liq o'ynagan. 20ta uchrashuvda asosiy tarkibda maydonga tushgan hamda o'yin davomida boshqa futbolchiga almashtirilgan. 9ta holatda esa u murabbiylar tomonidan zaxiradan maydonga tushirilgan. Mirjalol Qosimov milliy terma jamoa safida jami 5112 daqiqa harakat qilgan.

Ilk o'yini, goli va sariq kartochkasi

Qosimov terma jamoadagi debyutini 1992 yilning 17 iyun kunida Tojikistonga qarshi Markaziy Osiyo mamlakatlari kubogi doirasida o'tkazgan. O'sha o'yin O'zbekiston terma jamoasining ilk rasmiy o'yini edi. Uni terma jamoaga bosh murabbiy Rustam Akramov jalb qilgan. O'sha kuni u bahsni asosiy tarkibda boshlagan, ikkinchi bo'lim avvalida uni o'rniga Andrey Pyatnickiy maydonga tushgan. Uchrashuvda 2:2 hisob qayd etilgandi.

1994 yil Xirosimdagi Osiyo o'yinlari doirasida Saudiya Arabistoniga qarshi kechgan o'yinda Qosimov terma jamoa safidagi ilk golini urishga muvaffaq bo'lgan. Bahsning 19-daqiqasida yarim himoyachi arablar darvozasini ishg'ol qilgan va hisobni 2:0 ko'rinishiga keltirgan. O'yin esa 4:1 hisobida vakillarimizning g'alabasi bilan tugagandi.

Terma jamoa safidagi 67ta o'yinda ikki marta ogohlantirish olgan va bir bor qizil kartochka ishlab olgan. Qosimov 1998 yil Tailandda Osiyo o'yinlari doirasidagi Hindistonga qarshi bahsda birinchi sariq kartchokasini olgan.

Ishtirok etgan musobaqalari

Qahramonimiz Osiyo o'yinlari-1994da ishtirok etib jamoa bilan birga chempionlikka erishgan. Osiyo kubogi-2000 va Osiyo kubogi-2004 saralashlari va final bosqichlarida ishtirok etgan. Bundan tashqari Qosimov JCH-1998, JCH-2002 va JCH-2006 saralashlarida ham maydonga tushgan. 2000 yili Livanda o'tgan Osiyo kubogida Qosimov terma jamoamiz safida barcha 3ta uchrashuvida maydonga tushgan. O'sha musobaqada termamiz Qatar bilan durang o'ynagan va Saudiya Arabistoni hamda Yaponiyadan o'ta yirik hisoblarda mag'lub bo'lgan. Qatarga qarshi kechgan o'yinda Mirjalol Qosimov jarima to'pidan jamoamizning yagona golini urgan. Osiyo kubogi-2004da O'zbekiston chorak finalda Bahraynga penaltilar seriyasida yutqazib qo'yib musobaqani tark etgandi. Bu musobaqaning barcha o'yinida maydonga tushgan Qosimov Iroq va Turkmanistonga qarshi o'tgan o'yinlarda jarima to'plaridan gol urib jamoamizga g'alabalar keltirgandi.

Raqib terma jamoalar

Futbolchi sifatida 27ta davlat terma jamoalariga qarshi maydonga tushgan. Eng ko'p raqiblik qilgan jamoa bu - BAA. Arablarga qarshi Qosimov 6 marta maydonga tushgan. Keyingi o'rinda Turkmaniston bormoqda - 5ta o'yin.

Gollari

67ta o'yinda 31ta gol urgan yarim himoyachi bu borada terma jamoa tarixida to'rtinchi o'rinda. Qosimov 17ta davlat terma jamoasi darvozasiga gol ura olgan. Uning zarbalaridan eng ko'p jabr chekkan jamoa Xitoy Taypei hisoblanadi. Bu termaga qarshi o'tkazilgan uchta o'yinda Qosimov 5ta gol urgan. Qatar, Mo'g'uliston va Turkmanistonga qarshi o'yinlarda 3tadan gol urishga erishgan. Mirjalol Qosimov O'zbekiston terma jamoasi safida ikkita xet-trik, to'rtta dubl qayd etgan. Xitoy Taypeiga qarshi o'yinlarda ham dubl, ham xet-trik rasmiylashtirgan. Tailand, Tojikiston, Ummon bilan o'yinlarda ikkitadan, Mo'g'ulistonga qarshi bahsda uchta gol urgan.

Sariq kartochkalari

Yuqorida aytib o'tganimizdek Qosimov terma jamoa safida atiga 2ta sariq qartochka olgan. 1998 yilgi Osiyo o'yinlari doirasida Hindistonga qarshi bahsdan tashqari 2005 yil JCH-2006 saralashi doirasidagi Saudiya Arabistoni bilan o'yinda ogohlantirilgan.

Yillar

Qosimov 1992-2005 yillar davomida terma jamoada faoliyat olib borgan. U 2001 yil eng ko'p o'yin o'tkazgan – 14ta. 2004 yil esa qahramonimiz 10ta o'yinda harakat qilgan. Agar jarohatlar qiynab ko'ymaganida Mirjalol Qosimovning termadagi o'yinlari soni bundan ham ko'p bo'lishi aniq edi.

Qahramonimizning terma jamoadagi eng so'nggi o'yini 2005 yil 12 oktyabr sanasida Bahraynga qarshi bo'lib o'tgan.

Mirjalol Qosimovning yubiley o'yinlari

#	Raqib	O'yin maqomi	Hisob	Sana	Daqiqasi
1	Tojikiston	Markaziy Osiyo kubogi	2:2	17.06.1992	45
25	Bangladesh	Osiyo kubogi-2000 saralashi	6:0	21.11.1999	90
50	Tailand	Osiyo kubogi-2004 saralashi	4:1	21.11.2003	45
60	Xitoy Taypei	JCH-2006 saralashi	6:1	17.11.2004	90
67	Bahrayn	JCH-2006 saralashi	0:0	12.10.2005	90

Keyingi juma kuni Andrey Fyodorov haqida malumot beramiz.

Narzulla Saydullaev tayyorladi.

Terma jamoa gvardiyachilari #5. Mirjalol Qosimov