Etiboringizga bugungi oldi-sotdi xabarlarini taqdim etamiz. Marhamat, amalga oshadigan va oshishi mumkin bo'lgan transfer yangiliklari bilan tanishib oling.

"Manchester Yunayted" Garay bilan muzokara olib bormoqda

Angliyaning "Manchester Yunayted" jamoasi argentinalik yosh himoyachi Garayni o'z tarkibiga qo'shib olmoqchi.
Mankunianlar Lissabonning "Benfika" jamoasi sharafini himoya qilayotgan yosh himoyachi Ezikel Garayni sotib olish niyatida. So'nggi paytlarda juda ko'plab top klublar nazariga tushayotgan yosh argentinalikning Portugaliya poytaxtidagi damlari tugab borayotgan ko'rinadi. Boisi u uchun kurashga qo'shilayotgan jamoalar soni kundan-kunga ortib bormoqda. Garayni harid qilmoqchi bo'layotgan jamoalar orasiga "MYU"ning qo'shilgani ham bundan dalolat berib turibdi. Etiborli tomoni shunda-ki, A Bola tarqatgan xabarga ko'ra manchesterliklar allaqachon muzokaralarni boshlab yuborishgan. Demak, yaqin orada Garayning APL da paydo bo'lishi extimoli yuqori.

Fabio mavsum oxiriga qadar "Kardif Siti"da o'ynaydi

Uelsning "Kardif Siti" klubi "Manchester Yunayted" o'yinchisi Fabioni ijaraga oldi, deb xabar bermoqda Daily Mail.

Uelsliklar braziliyalik futbolchini mavsum so'nggiga qadar ijara olishdi. "Man Yunayted" asosiy tarkibidagi o'rnini yo'qotib qo'ygan Fabio o'yin amaliyotiga ega bo'lishni istamoqda. Shu boisdan braziliyalik o'yinchi "Kardif" safiga o'tishga rozilik berdi. "Qizil iblislar" rahbariyati ham bunga qarshilik qilgani yo'q. Endi Fabio yozga qadar Uels jamoasi sharafini himoya qiladi.

"Everton"ga hujumchi zarur

Franciyaning L'Equipe nashri tarqatgan xabarga ko'ra "Everton" tez orada yangi hujumchi sotib oladi.
Manbada aytilishicha, liverpulliklar yangi hujumchi qidirish ishlarini boshlab yuborishgan. Manzil esa Franciya. "Everton" murabbiylari asosan "Monako" safida to'p tepayotgan Emmanuel Rivier va "Lion" forvardi Aleksandr Lasazetni diqqat bilan kuzatishmoqda. Agar ushbu ikki futbolchining harakatlari jamoa rahbariyatiga ham maqul keladaigan bo'lsa, "Everton" tez orada muzokaralarni ham boshlab yuborishni ko'zlab turibdi. Lekin voqealar qanday rivojlanishini vaqt ko'rsatadi.

Kurt Zuma "Chelsi"da?!

Olingan so'nggi malumotalrga qaraganda, "Sent Etien" safida to'p tepayotgan Kurt Zuma tez orada yangi jamoa tarkibiga borib qo'shilishi mumkijn ekan.

Zumaga "Chelsi" va "Inter"dek kuchli klublar katta qiziqish bildirishmoqda. TIMES ning yozishicha Joze Mourino boshqaruvidagi jamoaning Kurt Zumaga qiziqishi jiddiy. Agar "Sent Etien" rozi bo'lsa, "aristokratlar" jamoasi 19 yoshli himoyachini qishdayoq o'z tarkibiga qo'shib oladi. Ammo bu amalga oshishi qiyin masala. Sababi francuzlar ham ushbu yosh iqtidor egasiga katta umid bog'lashmoqda. Ammo yana kim biladi, deysiz…

"Yuventus" etakchilarni olib qolmoqchi

Turinning "Yuventus" jamoasi tarkibdagi bazi bir ijrochilar bilan o'rtadagi shartnoma muddatini yana-da uzaytirish taraddudida.

Gap jamoa etakchilari bo'lmish Andrea Pirlo va Pol Pogba haqida bormoqda. Turin shahri bosh jamoasining eng keksa va tajribali o'yinchisi hisoblanuvchi Pirlo faoliyatini Turinda davom ettirish niyatida ekanini aytib o'tgandi. Pogbaga esa bir qator top klublardan takliflar kelib tushmoqda. Ammo "Yuventus" ham keyingi mavsumda yaxshi natijalarga erishishni maqsad qilgan. Shu boisdan klub rahbariyati jamoa etakchilarini olib qolish choralarini ko'rmoqda. La Gazzetta dello Sport ning bergan malumotiga qaraganda, tomonlar allaqachon muzokaralar stoliga o'tirishgan. Ko'rinib turibdiki, "Yuventus" jamoa ustunlarini olib qolish orqali muvaffaqiyatlarga erishishni ko'zlamoqda. Ko'ramiz bu amalga osharmikan…

Zoxirjon Akramxonov tayyorladi

Transfer xabarlari: Evropadan daraklar…