Odatda, bu ikki jamoa o'rtasidagi bellashuvlar keskinligi va yuqori tempda o'tishi bilan muxlislarga manzur keladi. Lekin, kecha bo'lib o'tgan bahsda darvozalarga gol kiritilmadi. Hujumkor uslubdagi "ajdarlar" muborakliklarning himoyasini yorib o'tishga qiynalishdi. Himoyada o'zini ko'rsata olgan va saytimiz tomonidan tur ramziy terma jamoasiga kiritilgan mezbonlar futbolchisi Samandar Shukurullaev fikrlari bilan o'rtoqlashdi.

"Karantindan so'ng barchamiz futbolni sog'ingan edik. Ayniqsa, voha derbisini anchadan beri orziqib kutgandik. Biz kutgandan ham og'ir o'yin bo'ldi. Biz futbolchilar murabbiyimizning ko'rsatmalarini to'g'ri bajardik deb o'ylayman. Uch oylik tanaffus istaymizmi, yo'qmi o'yin ritmidan chiqishga olib keladi. Bunda barcha birdek qiynalishi tabiiy.

"Nasaf" bilan bahsga himoyaviy taktikada maydonga tushdik. Ularga qarshi ochiq futbol o'ynab bundan ham ko'proq qiynalishimiz yoki ochkosiz qolishimiz mumkin edi. Shuning uchun ikkinchi raqam ostida harakat qildik. Qarshi hujumlardan unumli foydalanishga urindik. Ammo, ko'proq raqibning individual jihatdan kuchli futbolchilarini zararsizlantirishga etibor berdik",- deydi Samandar Shukurullaev.

Tur ramziy terma jamoasiga kirgan Samandar Shukurullaev: "Nasaf" bilan ochiq futbol o'ynasak qiynalardik"