"Qiyin klimatik sharoitlar ostida o'tgan o'yin bo'ldi. Shamol o'yinga tasir o'tkazdi. Gol urib olganimizdek so'ng o'yinni nazorat qildik. "Surxon" juda yaxshi shakllangan jamoa, omadimiz keldi va g'alaba qozondik. Keyingi bosqichga chiqa olganimizdan xursandman. "Lochin" jamoasi bizga muddatdan avval pley-offga chiqishga yordam berib yubordi" - dedi Vadim Karlenovich bahs yakunlangach.

- "Dinamo" joriy mavsumda hali mag'lubiyatga uchramadi. Jamoa mag'lubiyatsiz seriyasini qachongacha davom ettira oladi deb o'ylaysiz?

- Bizga ko'z teginishini xohlayapsizmi? Kuchimiz qanchaga etishini kelajakda bilib olamiz. Keyingi uchrashuvni "Sho'rtan"ga qarshi o'tkazamiz. Hozir omad biz tomonda va umid qilamanki, omad bizga kulib boqishda davom etadi.

- Anvarjon Hojimirzaev zaxiraga olinganiga nima sabab bo'ldi?

- U boshidan jarohat oldi va zaxiraga olinishini so'radi. Biz tavakkal qilmay uni almashtirdik. Balki boshi chayqalgandir.

- O'zPFL "Neftchi"ga qarshi o'yinni ko'chirdi. Ushbu qaror jamoangizga qanday tasir qildi? "Neftchi" o'tgan turda o'z darvozasidan to'rtta gol o'tkazib yuborgan edi, sizning jamoangiz esa hozir juda yaxshi formada. O'yin ko'chirilgani sizni xafa qilmadimi?

- Samarqandga yuqori darajadagi mehmonlar kela olmasligi malum bo'lganidan so'ng biz O'zPFLga uchrashuvni o'tkazishga tayyor ekanligimizni bildirdik, ammo "Neftchi" rozi bo'lmadi.

- Joriy mavsumda barcha jamoalar tig'iz taqvimda o'ynamoqda. Ushbu taqvim jamoangizga qanday tasir qilmoqda?

- Taqvim barcha jamoalar uchun bir xil, faqatgina "Dinamo" uchun emas. Meni hayron qoldirayotgan yagona jihat, bu mezbonlik masalasi. Misol uchun, biz "Sho'rtan"ga qarshi keyingi uchrashuvni G'uzorda o'tkazamiz, ammo bundan avvalgi uchrashuvlarni "Sho'rtan" neytral maydonda, yani Qarshida qabul qilgan edi. Endi "Xorazm"ga ham borish kerak bo'ladi. Mening bilishimcha, "Bunyodkor" mavsum boshidan buyon Toshkentdan chiqmadi. Ikki jamoa o'zaro kelishgan holda Toshkentda o'ynamoqda. Ochig'i, biz ham bajonidil Samarqandda kimdirni qabul qilgan bo'lar edik.

- "Andijon" bugun sensacion tarzda "Lochin"ga mag'lub bo'ldi. Bu natijasi esa "Dinamo"ni avtomatik tarzda keyingi bosqichga olib chiqdi. "Dinamo" guruh bosqichidagi so'nggi uchrashuvni Andijonda o'tkazadi. Bo'lajak uchrashuv haqidagi fikrlaringiz bilan bo'lishsangiz...

- Biz kamroq o'yin imkoniyatiga ega bo'layotgan futbolchilarga imkoniyat taqdim etamiz. O'ylaymanki, bunday qarorimiz uchun bizni jazolashmaydi.

- "Andijon"ga qarshi o'yin principial emasmi?

- Har bir raqibga qarshi o'yin biz uchun principial. Har qanday holatda ham birinchi o'rinda qolamiz. Shu sababli zaxira futbolchilariga imkoniyat berish to'g'ri qaror bo'ladi.

Vadim Abramov: "Har qanday holatda ham birinchi o'rinda qolamiz"