Uning asosiy qismini sizlarga taqdim etamiz.

- Bir necha kunlik BAA yig'inidan so'ng Toshkentga qaytib keldik. Mashg'ulotlar davom etmoqda. Toshkentda ham kuchli qor yog'di, hattoki nazorat o'yinlari qoldirildi. Shu bois mashg'ulotlar zalda olib borilmoqda. Yaxshiki bu erda suniy maydonlar bor, sharoitlar ham yaxshi. Ammo men uchun Toshkentdagi bu havo syurpriz bo'ldi.

- O'zbekiston varianti qanday paydo bo'ldi? O'tgan yil Isroilga ketishingiz haqida xabarlar chiqqandi…
- Menga variant taklif qilishdi, murabbiyga klub safida mavsum oxirida qolishimni aytdim. So'ngra Vladimir Bogdanovich bilan suhbatlashdim va Toshkentga ikki haftaga keldim.

– U erda nimani ko'rdingiz? Klubdagi sharoitlar qanday? “Paxtakor”, “Bunyodkor” va “Nasaf” klublari haqida eshitgandik. “Lokomotiv” esa ko'pchilikka notanish edi.
– Boshida barchasi yoqdi: yaxshi kutib olishdi, qiziqarli klub, rivojlanmoqda. Uning o'z bazasi va stadioni bor. Bitta holat menga g'alati tuyuldi, taklif bilan chiqishganida oyog'imda gips bor edi. Shu sababli mashg'ulotlarda ko'p ishlashimga to'g'ri keldi, jismoniy holatimni tiklashga urindim. To'g'risini aytsam anchadan buyon bunchalik yugurmagan edim. Chidadim va hozir o'zimni ancha yaxshi his qilayapman.

– “Lokomotiv” yig'in doirasida “Shaxter” bilan ham o'ynashga ulgurdi …
– “Lokomotiv” bilan ikkita yig'in o'tkazdim. Birinchisi O'zbekistonda – mahalliy klublarga qarshi o'ynab ular bilan tanishdim. BAAda esa xorij klublariga qarshi o'ynadik, Xitoy klubi, Arab klubi, Rossiyaning “Ural” va “Shaxter” bilan o'ynadik. Barcha o'yinlar ancha tezkor kechdi, shu bois biroz charchadik ham.

– Siz bilan birga moldovalik Kojokar ham “Loko”ga kelganini bilamiz. Tarkibda yana legionerlar bormi?
– Ha, rossiyalik Gogol bor.

– O'zbekiston haqida nima deya olasiz?
– Dastlabki taassurotlarim quyidagicha – odamlar mehmondo'st, klub yaxshi. O'zbekistonni ekzotik davlat deb atash qiyin. Bu erdagi insonlar mentaliteti bizga yaqin.

– O'zbekistonni aks ettirib turuvchi taom osh va do'ppi kiygan kishilar yo'qmi?
– Osh – haqiqatdan ham ajoyib taom ekan. Bu erda yoqqan eng yaxshi narsa aynan osh, doim uni tanovul qilamiz!

– Toshkentga ko'nikib ketdingizmi?
– Ha, Osiyo nafasi kelib turuvchi ko'hna shahar. Hozircha oilam kelmadi, shu bois klub bazasida yashayapman.

– Hujumda raqobat kuchlimi?
– “Lokomotiv”da har bir chiziqda raqobat kuchli, bitta joyga 3-4tadan futbolchi. Hujumchilar ko'p, qaysi biri o'yinga yaxshi tayyor bo'lsa o'sha tushadi.

– Osiyo chempionlar ligasidagi ilk o'yin 8 fevral kuni bo'lib o'tadi, ichki chempionat esa mart oyida boshlanadi. Chempionatga qanday tartibda tayyorlanasizlar?
– Barchasi Chempionlar liagsida saralashidan qanday o'tishimizga bog'liq. Agar birinchi o'yinni yutsak 15 yanvarda ikkinchi bosqich bo'ladi. Keyin esa guruh bosqichiga tayyorlanamiz.

– O'zbekcha gapirishni o'rganib oldingizmi?
– Hozircha yo'q, umid qilamizki yigitlar o'rgatib qo'yishadi (kuladi).

– O'zbekistondagi ikl mavsumda qanday maqsadlar qo'ydingiz?
– To'g'risi o'z oldimga aniq bir maqsad qo'ymayman, asosiysi sog' bo'lish. Klub oldiga qo'ygan vazifalar esa menga ham taaluqli.

– “Loko” Shevchenkoni tanishtirdimi?
– Yo'q, hozircha hech kimni tanishtirishmadi. Muxlislar bilan tezroq tanishib mahalliy futbolga tezroq moslashmoqchiman.

Narzulla Saydullaev tarjimasi.

Vyacheslav Shevchenko: "Lokomotiv"da meni yaxshi kutib olishdi"