Shu kuni mehmonlar o'zlarining mag'lubiyatli seriyasiga nuqta qo'yishni va peshqadamdan bir ochko bo'lsada olish ishtiyoqida maydonga tushishdi. Buni ularning harakatlaridan ilg'ash mushkul emas edi. Biroq, tajriba bu gal ham o'z so'zini aytdi.

Umuman olganda, Yangibozor tumani o'yingohiga yig'ilgan ko'p sonli muxlislar qiziqarli o'yin guvohiga aylanishdi. To'g'ri, urganchlik futbolchilarning o'yini birinchi bo'limda unchalik ham qovushmadi. Shunga qaramay, maydon egalari ko'plab hujum uyushtirishdi. Natijada, bir martagina “Alanga” jamoasi darvozasini aniq nishonga olishdi 11-daqiqada Mirza Quryozov jamoadoshini darvozabon bilan yakkama-yakka chiqishiga imkon yaratib berdi. O'z navbatida Temur Bekchanov hisobni ochishga muvaffaq bo'ldi, 1:0. Shundan keyin ikkala jamoada ham to'p kiritish uchun qulay vaziyatlar sodir bo'ldi. Ayniqsa, kosonlik Zeverqul Xudoyqulov va urganchlik Jasur Otajonovlarning zarbalari juda xavfli tus oldi.

Mubolag'a emas, ikkinchi bo'lim asosan “Xorazm”liklar ustunligida o'tdi. Bo'limning 46 va 48 – daqiqalari mezbonlar uchun omadli keldi. Zaxiradan maydonga tushgan Nizomjon Norov ikkita to'p kiritib, hisobni yirik ko'rinishga kirishini taminladi. Bu mezbonlarni yanada ruhlantirib yuborli. Ular mehmonlar darvozasi tomon son-sanoqsiz zarbalar uyushtirishdi. To'plarning ayrimlari noaniq ketgan bo'lsa, bazilarini darvozabon qaytarishni uddaladi. O'yin yakuniga bir necha daqiqa qolganida jamoaning yosh iqtidorli hujumchilaridan biri Mirza Quryozov “Alanga” jamoasi jarima maydonchasi ichiga chiroyli tarzda yorib kirib to'rtinchi gol muallifiga aylandi. Shu tariqa, Mirza joriy mavsumda kiritgan to'plari sonini 4 taga, Nizomjon esa 3 taga etkazishdi.
Asosiysi, “Xorazm” jamoasi o'z hisobiga navbatdagi uch ochkoni yozib qo'yish barobariga bu yilgi birinchilikdagi ilk yirik g'alabasini tantana qildi.

“G'arb” mintaqasi. 10- tur. 24 may (yakshanba)
“Xorazm” (Urganch) – “Alanga” (Koson) – 4:0 (1:0). Yangibozor tumani o'yingohi. 2180 tomoshabin.
Hakamlar: I. Ibragimov (Nukus) – 7,5, F. Dostonov (Jizzax) - 8,4,, M. Turdiev (Jizzax) – 8,4, X. Atamuratov (Xiva) - 8.
Nazoratchi: A. Tambovcev (Toshkent).
Gol: T. Bekchanov(12), N. Norov(46,49), M. Quryozov(87).

“Xorazm”: G'ayrat O'daev(Ravshan Jumaniyozov, 50), Marat Qudratov, Jasur Otajonov, Xushnud Quryozov, Marks Quronboev(Shohruh Iskandarov, 67), Rinat Bayramov(Jamoliddin Masharipov,59), Temur Bekchanov(Siroj Ro'zmetov, 73), Sarvar Jumaniyozov, Mirzo Quryozov, Javlon Egamov, Ilyos Xayrov(Nizomjon Norov, 30).
“Alanga”: Ibrohimjon Boboqulov(Sardor Sharofov,75), Muhriddin Rizvanov(Ixtiyor Ahmadjonov, 77), Olimjon Allanov(Abbos Baxshillaev, 65), Amirjon Temirov, Jonimbek Qoraev, Zeverqul Xudoyqulov(Sherzod Asliev, 80), Maruf Toshev, Jonibek Mirzaqulov(Jahongir O'tkirov,69), Bakir Murtozaev, Jahongir Jabborov, Sherzod Nasrullaev.

Ogohlantirishlar: I. Xayrov (27), J. Egamov (60) - O. Allanov (59).

Ikrom XUDOYBERGANOV

“Xorazm” - "Alanga" 4:0. To'liq sharh