"Насаф" расмий сайти клуб маркетинг бўлими бошлиғи Заҳро Каримова билан бўлган суҳбат орқали чипталар масаласи бўйича мухлисларда пайдо бўлаётган бир-иккита саволларга жавоб топди.

- Айтингчи, “Насаф”нинг 25 февраль куни бўладиган ОЧЛ-2015даги илк учрашувига тайёргарликлар қандай кечмоқда?

- “Насаф” ПФК маркетинг бўлимида айни кунларда ушбу футбол байрамига қизғин тайёргарлик ишлари кетмоқда. Ҳозирги кунда учрашувга чиқарилган чипталар тайёр бўлди. Чипталарни сотиш бўйича режаларимиз ҳам тайёр.

- Чипталар нархлари бўйича маълумотлар бера оласизми?

- Албатта. Бизнинг “Марказий” стадионимизда CIP ва яна 18та секторлар бор. Ушбу секторларни тўрт тоифага ажратганмиз. Булар 1-тоифа (CIP), 2-тоифа (1, 2, 6, 7 ва мухлислар клуби секторлари), 3-тоифа стадионнинг 2-қаватидаги секторлар (12, 13, 14, 15, 16, 17, 18), 4-тоифа футбол майдони дарвозаларининг орқа томонидаги (3, 4, 5 ва 9, 10, 11) секторлар. Ана шу тоифаларга монанд 1-тоифа чипта нархи 25 000 сўм, 2-тоифа чипта нархи 15 000 сўм, 3-тоифа чипталар нархи 10 000 сўм ҳамда 4-тоифа чипталар 5 000 сўм қилиб белгиланган.

- Чипталар қачон сотувга чиқарилади?

- Чипталар сотуви учрашувга 2 кун қолганда, яъни 23 февраль куни эрталабдан фақат стадион чиптахоналари орқали сотила бошланади ва учрашув куни ҳам давом эттирилади.

- Чипталарни олдинроқ сотувга чиқаришни имкони йўқми?

- Бу клубнинг иқтисодий хавфсизлиги юзасидан шундай қилинмоқда. Яъни қалбакилаштиришни олдини олиш учун биз шу қарорга келдик. Аммо жорий мавсумдан чипталарни олдинроқ, алоҳида буюртмалар асосида ҳам сотишни ташкил қилишни режалаштирганмиз. Масалан, воҳамиздаги корхона ёки ташкилотлар ўз ходимларига алоҳида буюртма асосида харид қилишлари мумкин. Бу ҳолатда корхона ёки ташкилот номидан клубимиз раҳбарига расмий хат билан мурожаат қилишади ва пул ўтказиш йўли билан тўловни амалгаоширишлари мумкин. Ушбу йўл билан харид қилинадиган чипталар сони чегараланмаган.

- Стадион чиптахоналаридан чипта харид қилаётган фуқароларга чипталар сони бўйича чеклов мавжудми?

- Ҳа, ҳар бир чипта харид қилаётган фуқоро бештагача чипта сотиб олиши мумкин. Бу чекловни чипталар олибсотарларнинг қўлига ўтиб кетмаслик учун қилаяпмиз.

- Чипталарни пластик карточкалар орқали ҳам харид қилиш мумкинми?

- Албатта. Ипотека банки ёнида 1-чиптахонамиз жойлашган. Ана шу чиптахонада терминал ўрнатилади ва у ерда пластик карточкалар орқали чипталарни бемалол харид қилиш мумкин бўлади.

- Ўзингиз биласиз, кўпгина хорижий давлатлардаги клубларда ўзларининг шартнома асосида чипта тарқатувчи агентлари бўлади, “Насаф” клубида ҳам шуни ташкил қилса бўлмайдими?

- Бу соҳада хорижий клубларни тажрибаларини ва ўзимизнинг мавжуд имкониятларимизни ўрганмоқдамиз. Келгусида чипталар сотувини шу йўл билан ҳам ташкил қилиш режамиз бор.

- “Насаф” ПФК маркетинг бўлими учрашув куни ўз мухлисларига яна нималарни таклиф қилиши мумкин?

- Жамоамизнинг ўйини ўтказилаётган кунларда биз ўз мухлисларимизга стадион ҳудудида жойлашган дўконларимиз орқали клуб атрибутикаларини, алкоголсиз ичимликлар ва енгил овқат турларининг савдосини ташкил қиламиз. Бу хизматдан барча учрашувга ташриф буюрган мухлислар фойдаланишлари мумкин.

- Бу охирги саволимиз эди. “Насаф” мухлисларига қандай тилакларингиз бор?

- Биз аввало мухлисларимиз соғ-саломат бўлишларини, юртимиз тинч бўлишини хоҳлаймиз. Зеро тинч ва обод юртга ана шундай байрамлар ярашади. Ўйлаймизки, футболчиларимиз янги мавсумда янги марраларни забт этиб, мухлисларни хурсанд этишади.

- Суҳбатингиз учун катта раҳмат.

Заҳро Каримова: "Чипталар сотуви учрашувга 2 кун қолганида бошланади"