Biz murabbiy bilan "Odil Junior"dagi faoliyati hamda "Zomin"ga o'tishi hususida suhbatlashdik.

- Siz uzoq vaqt davomida "Odil Junior"da ishladingiz. Nima uchun ketishga qaror qildingiz?
- Birinchi navbatda "Odil Junior" akademiyasida birga ishlagan barcha insonlarga rahmat aytmoqchiman. Sevimli ishim bilan shug'ullanish va yosh futbolchilarni rivojlantirish uslubini tubdan o'zgartirgan tajribali mutaxassislardan bilim olish imkoniyatini yaratib bergan Odil Ahmedovga alohida rahmat aytaman. Bu uslub esa o'z mevasini berishni boshlab yubordi – bu yil Akademiyaning 46 nafar futbolchisi turli yoshdagi terma jamoalarda o'ynashmoqda. 6 nafar futbolchi esa o'tgan yil Indoneziyada o'tgan U-17 Jahon chempionatida ishtirok etib qaytishdi. Yangi chorlovni qabul qilish vaqti kelgani uchun "Zomin"ga o'tdim.

- "Zomin" varianti qanday paydo bo'ldi?
- "Zomin" klubi strategiyasi "Odil Junior" akademiyasidagi ishlarning davomi hisoblanadi, faqat kattalar darajasida. "Zomin" jamoasi asosini 2006-2007 yillarda tug'ilgan yigitlar tashkil etadi.

- Jamoaning maqsadi hamda vazifalari qanday?
- Maqsadimiz bitta - yosh futbolchilarga kattalar futbolida imkoniyat yaratib berish va yangi Shomurodov, Husanov va Fayzullaevlarni chiqarish. Buning uchun mehnat va sabr qilish kerak, shundagina natija bo'ladi. Bundan tashqari raqib kim bo'lishidan qatiy nazar har bir o'yinda g'alaba uchun o'ynaymiz. Hozirgacha biz bir marta o'rtoqlik uchrashuvi o'tkazdik. Birinchi liga ishtirokchisi hisoblangan Sirdaryo FA jamoasini 9:1 hisobida mag'lub etdik. O'zbekiston kubogi guruh bosqichiga chiqish uchun bahsda Navoiy FA jamoasini 7:0 hisobida taslim qildik. Guruh bosqichida bizning jamoa "Lokomotiv" va "Qizilqum" kabi Superliga klublariga qarshi o'ynaydigan bo'ldi.

Abdulaziz Iskandarov suhbatlashdi

Zayniddin Tojiev - "Odil Junior"dagi faoliyat va "Zomin"ga o'tish haqida