Futbolchilarimiz dunyoning sakkiz kuchli jamoasi qatoridan o'rin olishga muvaffaq bo'lishdi. Hamyurtlarimizning ushbu natijasi tarixiy voqealik albatta.

Mamlakatimiz terma jamoasining ushbu yutug'ida ikki nafar urganchlik futbolchi- Jamshid Iskandarov va Jaloliddin Masharipovlarning ham hissasi borligidan xorazmliklar nihoyatda quvonishayapti.

Kecha kechqurun “Urganch” xalqaro aeroportida ushbu futbolchilar tantanali ravishda kutib olindi. Toshkent-Urganch yo'nalishi bo'yicha parvoz qilgan samolyot aeroportga kelib qo'nishi bilan karnay-surnaylarning sho'x sadosi yon-atrofni tutib ketdi. Kutib olishga chiqqanlar orasida Xorazm viloyati hokimining o'rinbosari Ravshan Jabborov, viloyat madaniyat va sport ishlari boshqarmasi boshlig'i o'rinbosari Azamat Yo'ldoshev, viloyat futbol federaciyasi birinchi vice prezidenti Ravshan Otajonov, futbolchilar tahsil olgan Yangibozor tumanidagi 9-son futbolga ixtisoslashgan maktab-internati rahbariyati va murabbiylari, “To'maris” jamoasi qizlari, futbolchilarning ota-onalari, yaqinlari, do'stlari, futbol ishqibozlari hamda ommaviy axborot vositalari xodimlari bor edi.

Mana, dunyo futbol ahlini lol qoldirishgan yigitlar chiqish yo'lakchasida ko'rinish berishdi. Beixtiyor yig'ilganlar ko'zlarida quvonch yoshlari paydo bo'ldi. Oyog'idagi jarohatiga qaramay, Jamshid jamoadoshi Jaloliddin bilan birgalikda qadrdonlari sari oshiqishdi.

Shu erning o'zida kichik tadbir bo'lib o'tdi. Xorazm viloyati hokimining o'rinbosari Ravshan Jabborov futbolchilarimizni erishgan muvaffaqiyatlari bilan muborakbod etdi. Kelgusida o'zbek futbolini rivoji yo'lida yosh “charm to'p” ustalariga omadlar tiladi. So'ngra, Jamshid Iskandarov va Jaloliddin Masharipov hamda ularning birinchi murabbiyi Olimboy Davletovlarga hurmat-ehtirom ramzi sifatida zarbop to'n kiygizildi. Anvoyi gullardan iborat guldastalar taqdim qilindi.

Shu o'rinda aytish joizki, futbolchilarimiz ishtirokidagi tadbir va uchrashuvlar Xorazm vohasida davom etadi.

Ikrom XUDOYBERGANOV.

Jamshid va Jaloliddin Urganchda tantanali tarzda kutib olindi