2013 yilgi chempionat FIFA tomonidan o'tkazib kelinayotgan 15-o'smirlar mundialiga aylanadi. 17 yoshgacha bo'lgan o'smirlar o'rtasidagi musobaqa sifatida esa 12-bor o'tkaziladi. Undan avval yosh chegarasi qilib 16 yosh belgilangan. Turnirning BAAda bo'lib o'tishi haqida FIFA 2 yil avval malumot bergandi. FIFA BAA va Ganadan iborat tanlovda Amirliklar davlatining imkoniyatini ko'proq baholadi. Bundan avval BAAda 2003 yil yoshlar o'rtasidagi jahon chempionati o'tkazilgan.

O'smirlar o'rtasidagi jahon chempionatida bu safar 1996 yil 1 yanvaridan keyin yoki shu sanada tavallud topgan o'yinchilar ishtirok etishlari mumkin.

Uchrashuvlarni boshqarib borishga jalb etilgan hakamlar ro'yxatiga nazar tashlar ekanmiz, ular ichida mashhur nomlarni ko'ramiz. Mark Klattenburg, Volfgang Shtark va Janluka Rokki shunday nufuzdagi hakamlar hisoblanadi.

Demak, hakamlarning to'liq ro'yxati quyidagicha:
Osiyo - Halil Al Gamdi (Saudiya Arabistoni), Kim Don Jin (Janubiy Koreya), Abdulrahmon Abdu (Qatar).
Afrika - Badara Diatta (Senegal), Daniel Bennet (JAR), Slim Jedidi (Tunis).
Shimoliy Amerika - Elmer Bonilya (Salvador), Marko Rodrigez (Meksika), Jair Marrufo (AQSH).
Janubiy Amerika - Nestor Pitana (Argentina), Raul Orosko (Boliviya), Xeber Lopez (Braziliya), Martin Velaskez (Urugvay), Xuan Soto (Venesuela).
Okeaniya - Norbert Xauata (Taiti).
Evropa - Pavel Kralovec (Chexiya), Mark Klattenburg (Angliya), Volfgang Shtark (Germaniya), Janluka Rokki (Italiya), Sveyn Oddvar Mun (Norvegiya), Kreyg Tomson (Shotlandiya).

Guruhlarda ochko teng bo'lib qolgan taqdirda quyidagi holatlarga birinchi navbatda etibor qaratiladi:
- barcha uchrashuvlardagi to'plar farqi
- barcha o'yinlarda kiritilgan to'plar soni
- bir xil ochkoga ega jamoalarning o'zaro bahslarda qo'lga kiritgan ochkolari
- bir xil ochkoga ega jamoalarning o'zaro o'yinidagi natijasi
- bir xil ochkoga ega jamoalarning o'zaro uchrashuvlarda kiritgan to'plari
- tashkiliy qo'mita qurasi

Yani, yuqoridagi barcha jihatlar bo'yicha jamoalar bir xil ko'rsatkichga ega bo'lsalar, unda oxirgi chora sifatida qura tashlash marosimi o'tkaziladi. Uchinchi o'rin sohibini aniqlashda esa ochkolarga etibor beriladi. Mabodo ochkolar bir xil bo'lgan taqdirda guruhdagi to'plar farqi yoki kimning ko'proq gol urgani inobatga olinadi.

Behzod Nazarov tayyorladi.

JCH-2013 (U-17). Musobaqa hakamlari va reglament