Bugun ushbu musobaqaning guruh bosqichi doirasidagi so'nggi uchrashuvlar bo'lib o'tdi. “Bunyodkor-2001” mazkur turda Jizzax shahri jamoasi bilan guruh g'olibligi uchun kurash olib bordi. Ushbu o'yingacha har ikkala jamoada bittadan g'alaba borligi va guruhdan faqat birinchi o'rinni egallagan jamoagina keyingi bosqichga chiqishi bois uchrashuv ahamiyati katta bo'ldi.

Uchrashuvda birinchi bo'lib jizzaxliklar hisobni ochishdi. Vaziyatni o'nglash uchun toshkentliklar katta kuch bilan oldinga o'tishdi. Bu harakatlar ko'p o'tmay samarasini berdi. Burchakdan oshirib berilgan to'pni Jasur Holdorov chiroyli tarzda darvozaga joylab qo'ydi – 1:1. Keyingi daqiqalarda o'yin tempi biroz tushdi. Lekin birinchi taym yakunlanishiga bir necha daqiqalar qolganida jizzaxliklar yana hisobda oldinga o'tib olishdi – 1:2.

Ikkinchi bo'limda “qaldirg'ochlar” muvozanatni tiklashga urunishdi va o'z niyatlariga erishishdi. Burchakdan oshirib berilgan to'pni Zokir Hasanov darvozaga aniq yo'llab, hisobni tenglashtirdi – 2:2.

Har ikkala jamoa uchun qiyin kechgan bahs jangavor durang bilan yakun topdi.

“B” guruhi. Yakuniy jadval

#	Jamoa	O'	YU	D	M	T-F	O
1	“Bunyodkor”	2	1	1	0	11-2	4
2	“Jizzax”	2	1	1	0	6-3	4
3	“Chirchiq”	2	0	0	2	1-13	0

“Qaldirg'ochlar” to'plar farqiga ko'ra guruhda birinchi o'rinni egallashdi. “Bunyodkor-2001” yarim finalda “Lokomotiv” bilan bellashadi. O'yin “Chilonzor” stadionida soat 10:00da boshlanadi.

Jo'ra Xonnazarov xalqaro turniri. “Bunyodkor-2001” yarim finalda