Darhaqiqat, musobaqaning birinchi qismida ko'p hollarda osoyishtalik hukm suradi. Natijalar sarhisobi boshlanganda futbol tili bilan aytganda “sensacion” hisoblar ko'paya boradi. Afsuski, milliy chempionatimizda bugungi kunda futbol shinavandalariga na sensaciyaning va na chempionat jadvalining qizig'i yo'q bo'lib qolgan. Bunga o'yinlarga tushayotgan muxlislar sonining turdan turga kamayib borayotgani misol bo'la oladi. Sentyabr oyida OAVda muxlislar tashrifi nega kamayib ketdi, degan savolga turli yo'nalishlarda javob izlandi. Deyarli barchaning fikri bir xil ko'rinishda ekanligidan kelib chiqsak, bu muammoni tezda bartaraf etish mumkin. Biroq kim bu ishni amalga oshiradi, degan savol bor. Chempionatimizni biror etakchi xorij chempionati bilan taqqoslamasakda, futbolni tomoshabinsiz tasavvur qilib bo'ladimi?

Yuqoridagi mavzuga qaytsak. Jo'jalar sarhisobi bu yil anchagina qiziqarli va shiddatli o'tadiganga o'xshayapti. Sentyabr oyi yakunlariga ko'ra yuzaga kelgan turnir jadvaliga bir nazar tashlasak.

#	Jamoa	O'	YU	D	M	T-n	Farq	O
1	NEFTCHI	3	3	0	0	9-0	+9	9
2	DINAMO	3	2	1	0	4-1	+3	7
3	PAXTAKOR	3	2	1	0	6-4	+2	7
4	LOKOMOTIV	3	2	0	1	6-2	+4	6
5	METALLURG	3	2	0	1	7-5	+2	6
6	BUNYODKOR	3	1	2	0	5-0	+5	5
7	SHO'RTAN	3	1	2	0	3-0	+3	5
8	BUXORO	3	1	1	1	3-4	-1	4
9	OLMALIQ	3	1	1	1	3-5	-2	4
10	QIZILQUM	3	1	0	2	1-3	-2	3
11	NASAF	3	0	1	2	2-5	-3	1
12	SO'G'DIYONA	3	0	1	2	5-9	-4	1
13	NAVBAHOR	3	0	0	3	3-11	-8	0
14	GULISTON	3	0	0	3	3-11	-8	0

Ko'rib turganingizdek, besh jamoa kuzning birinchi oyini mag'lubiyatsiz tugatgan. To'rt jamoa esa g'alaba qozona olmagan. So'nggi ikki o'rindagi “Navbahor” va “Guliston”ning ko'rsatkichlari bir xil. Chempionlik uchun kurashayotgan “Nasaf”ning natijalari ham maqtagulik emas. Farg'onaliklar esa 3 imkoniyatdan to'liq foydalanganliklari etiborga molik.

Oktyabr oyida 21-24 tur o'yinlari bo'lib o'tadi. 21-turda sentyabr oyini muvaffaqiyatsiz o'tkazgan “Guliston” va “Navbahor” kuch sinashsa, “Nasaf” turdan turga kuchayib borayotgan “Neftchi”ni qabul qiladi. “Bunyodkor” va “Dinamo” uchrashuvi ham qiziqarli o'tishi kutilmoqda. Poytaxt derbisida “Lokomotiv” - “Paxtakor” bahsi, juma oqshomini bezab bersa ajabmas. “Olmaliq” o'z maydonida “Buxoro”ni qabul qilsa, “So'g'diyona” – “Metallurg” va “Qizilqum” – “Sho'rtan” uchrashuvlari ham muxlislar etiboridan chetda qolmaydigan shiddatga ega bo'ladi. Bu o'yinlarda har bir jamoaning fidoiy ishqibozlari stadionlarni to'ldirib, o'z jamoalarini qo'llab-quvvatlab kerakli “jo'jalar”ni yig'ishlariga ko'maklashishadi, deb umid qilamiz.

Baxtiyor Shirinov tayyorladi.

Jo'jani kuzda sanaymiz