Сўнгги йилларни ҳисобга оладиган бўлсак, бундай футболчилар тўрт нафарни ташкил қилади. Қайта оёққа тураётган "россонери" лойиҳаси яна кучли футболчиларни қизиқтира бошлади. Натижада, клуб қатор футболчиларни ўз таркибига жалб қила олди ва улар кейинроқ юлдузга айланди. Мисол учун Тео Эрнандес ва Рафаэль Леаони жаҳон даражасидаги футболчи десак, муболаға бўлмаса керак.

"Милан" "Челси"да омади чопмаган тўрт нафар футболчига фаолиятини қайта "жонлантириш" учун имкон берди. Уларнинг охиргиси Фикайо Томори. Англиялик марказий ҳимоячи турли клубларда ижараларда ишончли ўйин кўрсатганига қарамай, "кўклар" таркибида бор йўғи 27 учрашувда майдонга тушди.

Бироқ А Серияга кўчиб ўтгач, у лиганинг энг яхши марказий ҳимоячиларидан бирига айланди. "Челси"дан кетиб, "Милан"да қайта очилган Оливье Жиру бўлди. Франциялик "аристократлар" сафидаги охирги мавсумида Премьер-лигада бор йўғи тўртта гол уришни уддалади. Италияга кўчиб ўтгач, "россонери" сафидаги 123 учрашувда 47 та гол урди. Учинчи ўринда — Рубен Лофтус-Чик. "Челси"да порлаши тахмин қилинган, аммо муқим ўрин топа олмаган футболчи Италиядаги илк мавсумидаёқ 35 ўйинда 10 та гол урди.

Бу рўйхатнинг яна бир вакили Кристиан Пулишич. Америкалик вингер охирги саккиз ой ичида 41 баҳсда 21 та гол урди.

"Челси"да ишингиз қовушмадими, унда "Милан"га йўл олинг