Маълумки, ушбу мусобақа Тошкент шаҳар футбол федерацияси ташаббуси билан пойтахтимизда илк бор ташкил қилинди. 12та жамоа иштирок этган мазкур турнир болаларда илиқ таассурот қолдирди. Негаки барча ўйинлар ўзига яраша қизиқ кечди. Айниқса, турнирнинг ҳал қилувчи финал учрашуви анча қизиқ ўтди.

Унгача эса 3-ўрин учун баҳс ташкил этилди ва бунда "Насаф" ва "Локомотив" ўзаро баҳс олиб борди. Бунда "Насаф" тарбияланувчилари 2:1 ҳисобида зафар қучишди. Шундан кейин майдонга турнирнинг иккита энг кучли жамоаси "Бунёдкор" ва "Пахтакор" футболчилари тушишди.

Шу ўринда ҳар иккала жамоанинг финалгача босиб ўтган йўлини эслаб ўтсак.

"БУНЁДКОР"
1-тур. "Бунёдкор" - РОЗСК 8:0
2-тур. "Бунёдкор" - "Қўқон-1912" 15:1
3-тур. "Бунёдкор" - "Пахтакор"-2008 3:0

Ярим финал
"Бунёдкор" - "Насаф" 2:0

"ПАХТАКОР"
1-тур. "Пахтакор" - "Челано" 5:0
2-тур. "Пахтакор" - "Насаф" 2:2
3-тур. "Пахтакор" - "Эден Спорт" 5:1

Ярим финал
"Пахтакор" - "Локомотив" 6:2

Ҳал қилувчи финал ўйинида аввалига "Бунёдкор" футболчилари ҳисобни очишди. Кейинроқ "Пахтакор" тарбияланувчилари ҳисобни тенглаштиришди. Ўйин охиригача шу 1:1 ўзгармади ва якунда барчаси пенальтилар сериясида ҳал бўлди. "Лотереялар" баҳсида омад "Бунёдкор"га кулиб боқди ва ёш "қалдирғочлар" 3:2 ҳисобида зафар қучишди.

3-ўрин учун баҳс. 2 май
"Насаф" - "Локомотив" 2:1

ФИНАЛ. 2 май
"Бунёдкор" - "Пахтакор" 1:1 (пенальтилар бўйича 3:2)

Шундай қилиб "Бунёдкор-2007" Тошкентда ўтказилган "Локобол" турнири ғолибига айланди ва Россиянинг Новосибирск шаҳрида бўлиб ўтадиган иккинчи босқич ўйинларига йўлланма соҳиби бўлди. Турнир якунида мусобақанинг асосий ташкилотчилари Россия болалар футболининг Марказий Осиё бўйича етакчи вакили Айдос Кашкеев ҳамда ТФФ вице-президенти Нодирхўжа Юлдашев томонидан ғолиб ва совриндорларга медаллар ҳамда кубок топширилди.

Шунингдек, чизиқлар бўйича энг яхшилар аниқланди:

Энг яхши дарвозабон: Данельян Карен ("Насаф")
Энг яхши ҳимоячи: Давлетов Дидар ("Пахтакор")
Энг яхши ярим ҳимоячи: Турғунбеков Азиз ("Бунёдкор")
Энг яхши ҳужумчи: Худойберганов Шоҳрух ("Локомотив")
Мусобақанинг энг яхши футболчиси: Ҳалимтоев Шоҳрух ("Бунёдкор")

"Локобол" саралаш босқичи тугади. "Бунёдкор"-2007 Россияга боради