Давралар оралиғида “Шўртан”дан “Нефтчи”га ўтган тажрибали ярим ҳимоячи Вячеслав Понамарёв фарғоналиклар сафида “Бунёдкор”га қарши ўйинда сариқ карточка олди. Шу тариқанинг унинг мавсумдаги огоҳлантиришлари сони 4тага етди. Энди Понамарёв 14 сентябрь куни Фарғонада “Олмалиқ”қа қарши ўйинни ўтказиб юборади.

“Гулистон” ҳимоячиси Акбар Саттаев “Пахтакор”га қарши ўйинда қизил карточа олгани ҳақида хабар бердик. Бу футболчи 18-турдан ўрин олган “Металлург” – “Гулистон” учрашувида майдонга туша олмайди.

Шу ўйинда майдон эгалари сафида ҳам асосий ҳимоячи майдонга тушмайди. Сабаби Дилмурод Каримов “Олмалиқ”қа қарши ўйинда тўртинчи бор сариқ карточка олди.

“Қизилқум”га қарши Тошкентдаги ўйинда “Пахтакор” сафида ўнг қанот ҳимоячиси Даврон Ҳошимов майдонга туша олмайди. Сабаби у “Гулистон”га қарши ўйинда мавсумдаги 4-сариқ карточкасини “ишлаб олди”. Энди Ҳошимов бу ўйинни фақат томоша қила олади ҳолос.

17-турда “Навбаҳор”га гол уриб “Динамо”га 1 очко келтирган ярим ҳимоячи Азамат Бобожонов кейинги турни ўтказиб юборишга мажбур. Ярим ҳимоячи водийдаги баҳсда сариқ карточка олди. Унинг огоҳлантиришлари сони тўрттага етди. Энди 14 сентябрь санасида Самарқандда бўлиб ўтадиган “Динамо” – “Сўғдиёна” ўйинида Бобожоновни майдонда кўрмаймиз.

Ғузорнинг “Шўртан” клуби ҳужумчиси Павел Соломин ҳам 18-турда ўзи истаса ҳам туша олмайди. “Бухоро”га бой берилган ўйинда Соломин Равшан Эрматовдан огоҳлантириш олди ва унинг сариқлари сони 4тага етди. Павел энди пешқадам “Бунёдкор”га қарши Ғузордаги ўйинда ўйнамайди.

Бундан ташқари бугун бўлиб ўтган ёшлар лигасининг 18-туридан ўрин олган "Локомотив" - "Насаф" учрашувида майдон эгаларининг икки ҳимоячиси Сардор Раҳмонов ва Бобур Йўлдошев қизил карточка олишди. Регламентга кўра энди бу икки ўйинчи ҳам эртанги ўйинда майдонга туша олишмайди.

Нарзулла Сайдуллаев

Олий лига-2013. 18-тур дисквалификациялари