Davralar oralig'ida “Sho'rtan”dan “Neftchi”ga o'tgan tajribali yarim himoyachi Vyacheslav Ponamaryov farg'onaliklar safida “Bunyodkor”ga qarshi o'yinda sariq kartochka oldi. Shu tariqaning uning mavsumdagi ogohlantirishlari soni 4taga etdi. Endi Ponamaryov 14 sentyabr kuni Farg'onada “Olmaliq”qa qarshi o'yinni o'tkazib yuboradi.

“Guliston” himoyachisi Akbar Sattaev “Paxtakor”ga qarshi o'yinda qizil kartocha olgani haqida xabar berdik. Bu futbolchi 18-turdan o'rin olgan “Metallurg” – “Guliston” uchrashuvida maydonga tusha olmaydi.

Shu o'yinda maydon egalari safida ham asosiy himoyachi maydonga tushmaydi. Sababi Dilmurod Karimov “Olmaliq”qa qarshi o'yinda to'rtinchi bor sariq kartochka oldi.

“Qizilqum”ga qarshi Toshkentdagi o'yinda “Paxtakor” safida o'ng qanot himoyachisi Davron Hoshimov maydonga tusha olmaydi. Sababi u “Guliston”ga qarshi o'yinda mavsumdagi 4-sariq kartochkasini “ishlab oldi”. Endi Hoshimov bu o'yinni faqat tomosha qila oladi holos.

17-turda “Navbahor”ga gol urib “Dinamo”ga 1 ochko keltirgan yarim himoyachi Azamat Bobojonov keyingi turni o'tkazib yuborishga majbur. Yarim himoyachi vodiydagi bahsda sariq kartochka oldi. Uning ogohlantirishlari soni to'rttaga etdi. Endi 14 sentyabr sanasida Samarqandda bo'lib o'tadigan “Dinamo” – “So'g'diyona” o'yinida Bobojonovni maydonda ko'rmaymiz.

G'uzorning “Sho'rtan” klubi hujumchisi Pavel Solomin ham 18-turda o'zi istasa ham tusha olmaydi. “Buxoro”ga boy berilgan o'yinda Solomin Ravshan Ermatovdan ogohlantirish oldi va uning sariqlari soni 4taga etdi. Pavel endi peshqadam “Bunyodkor”ga qarshi G'uzordagi o'yinda o'ynamaydi.

Bundan tashqari bugun bo'lib o'tgan yoshlar ligasining 18-turidan o'rin olgan "Lokomotiv" - "Nasaf" uchrashuvida maydon egalarining ikki himoyachisi Sardor Rahmonov va Bobur Yo'ldoshev qizil kartochka olishdi. Reglamentga ko'ra endi bu ikki o'yinchi ham ertangi o'yinda maydonga tusha olishmaydi.

Narzulla Saydullaev

Oliy liga-2013. 18-tur diskvalifikaciyalari