"Ғалаба билан барчани табриклайман. Яхшигина қаршиликка учрадик. Рақиб учрашувга яхши тайёргарлик кўргани кўриниб турибди ва деярли вазият яратишга имкон бермади. Рақиб ҳимоясини хато қилишга мажбур қилдик ва муҳим уч очкони қўлга киритдик. Бугун ўйин тезлиги юқори бўлмади. Ҳаво ҳам иссиқ эди. Бугун натижа учун ўйналди", - дея фикр билдирди Рўзиқул Бердиев бугунги баҳс ҳақида.

- Рубин Хебай нега ўйнамай қўйди?

- Сабаби Ҳусайн Норчаев ундан яхшироқ спорт формада. Норчаев бугун гол урмагандир, аммо жамоага кўп ёрдам берди. Хебай ҳам ўйинга яхши қўшилиб кетди деб ўйлайман. Агар зарбаси голга айланганида, турнинг энг чиройли голларидан бири бўлар эди.

- Терма жамоа сафидан қайтган футболчиларнинг ҳолати қандай?

- Бу ҳар доим таъсир қилади. Сабаби терма жамоада ва клубда турли хил тизимда тайёргарлик кўрилади. Ҳар бир футболчининг ҳолати ҳар хил. Акмал бугун бизга ёрдам берди, аммо биз кутган ўйинни намойиш эта олмади. Баъзида ушбу фактор ўз сўзини айтади.

- Акмал сўнгги вақтларда майдонда кўп баҳслашадиган бўлиб қолди...

- Суҳбат олиб бориш керак. У қизиққон, аммо футболчи ўзини назорат қила олиши керак. Кераксиз жойдан карточка олиб қўйиши мумкин.

- "Насаф" футболчилари кўпинча дарвозабон ҳудудидан гол уришмоқда, нега узоқ масофадан зарбалар камайиб кетди. Бу сизнинг кўрсатмангизми?

- Мен узоқдан тепинглар деб кўрсатма бераман. Англия ва ўзбек футболини таққослаш ҳам нотўғри. Баъзида йигитлар бундай қарор қабул қилишмайди. Узоқ масофалардан ҳам голлар урдик. Бугун "Навбаҳор" яхши ҳимояланди ва бундай ўйинларда кўп вазиятлар яратилмайди.

- Шерзод Насруллаев бугун майдонга тушмади...

- У терма жамоа сафидан қайтди ва жамоа билан бирга кўп машғулот ўтказа олмади. Енгил жароҳати борлиги туфайли, таваккалга қўл урмадик. Кейинги учрашувларда сафга қайтади деган умиддаман.

Рўзиқул Бердиев: "Бундай ўйинларда кўп вазиятлар яратилмайди"