Соат 18:15да бошланган машғулот янги бош мураббий бошчилигида ўтди. Бунгача жамоа машғулотини сиртдан кузатган украиналик мураббий ниҳоят душанба кундан ишга киришди. Айтиш керакки, жамоанинг ашаддий мухлислари Сергей Шевченконинг машғулотларини соғиниб қолишган шекилли, шу куни бир талай мухлислар стадионга келиб бевосита кузатди.

Янги мураббийнинг биринчи кунги машғулоти шахсан бизда илиқ таассурот қолдирди. Тактик ва жисмоний тайёргарлик борасида футболчиларга керакли юкламаларни берган Шевченко футболчиларни икки таркибга ажратган холда, вақти-вақти билан уларнинг ҳар бири билан алоҳида ишлади. Машғулотлар жараёнида бош мураббийга Ориф Маматказин ва Қобулжон Олимжонов ёрдам берди.

Биринчи даврадан сўнг 4 очко жамғариб, турнир жадвалининг сўнгги поғонасидан ўрин эгаллаб турган “Андижон”ни қандай бўлмасин кучлилар сафида олиб қолиш учун бир қатор ўзгаришлар қилинаётганини кўриш мумкин. Жуда қийин бўлган иш. Лекин уддаласа бўлади. Ҳар холда Шевченко бунинг учун астойдил ишга киришганини кўриш мумкин.

Душанба кунги машғулотларда жами 23 нафар футболчи шуғулланди. Айни пайтда таркибда юз бераётган ўзгаришлар мухлисларнинг диққат марказида турибди десак муболаға бўлмайди. Шу боис бу борада қисқача тўхталиб ўтадиган бўлсак, биринчи даврада “бургутлар” шарафини ҳимоя қилган Сергей Доценко, Алексей Касьян, Жавлон Мирабдуллаев, Алишер Азизов, Шаҳзод Шайманов ҳамда Камрон Кападзе шу куни машғулотларда кўриниши бермади. Афтидан бу ўйинчилар билан жамоа хайрлашган кўринади.

“Андижон” таркибига янги келиб қўшилганлардан эса Лочин Долимов, Баҳром Юлдашев (“Хотира-79”), Аюбхон Гаппаров (“Чуст-Пахтакор”) Иқбол Акрамов (“Олмалиқ”), Азиз Алижонов (“Нефтчи”), Сардор Соибов (“Металлург”) каби футболчиларни учратдик. Ҳозирча бу футболчилар кўрикдан ўтмоқда. Агарда уларнинг ҳатти-ҳаракатлари мураббига мақул келса, жамоада олиб қолинади.

Айтишларича бу билан селекция жараёни тўхтаб қолмайди ва яқин кунлар давомида яна бир қатор таниқли номлар йиғинга келиб қўшилади.

Дарвоқе, оғир жароҳат сабаб бир неча йил майдон ташқарисида юрган тажрибали футболчи Шуҳрат Мирхолдиршаев асосий гуруҳ билан бирга машғулотларда иштирок этаётганини ҳам айтиб ўтиш лозим.

Андижонликлар эртага, 16 июль куни биринчи лига вакили “УзДонгЖу” билан синов-назорат баҳсини ўтказишни режалаштирган. Бу ҳақда эртага аниқ муълумот бериб ўтамиз.

Исломбек РУСТАМБЕКОВ.

Шевченко “Андижон”да расман иш бошлади