Soat 18:15da boshlangan mashg'ulot yangi bosh murabbiy boshchiligida o'tdi. Bungacha jamoa mashg'ulotini sirtdan kuzatgan ukrainalik murabbiy nihoyat dushanba kundan ishga kirishdi. Aytish kerakki, jamoaning ashaddiy muxlislari Sergey Shevchenkoning mashg'ulotlarini sog'inib qolishgan shekilli, shu kuni bir talay muxlislar stadionga kelib bevosita kuzatdi.

Yangi murabbiyning birinchi kungi mashg'uloti shaxsan bizda iliq taassurot qoldirdi. Taktik va jismoniy tayyorgarlik borasida futbolchilarga kerakli yuklamalarni bergan Shevchenko futbolchilarni ikki tarkibga ajratgan xolda, vaqti-vaqti bilan ularning har biri bilan alohida ishladi. Mashg'ulotlar jarayonida bosh murabbiyga Orif Mamatkazin va Qobuljon Olimjonov yordam berdi.

Birinchi davradan so'ng 4 ochko jamg'arib, turnir jadvalining so'nggi pog'onasidan o'rin egallab turgan “Andijon”ni qanday bo'lmasin kuchlilar safida olib qolish uchun bir qator o'zgarishlar qilinayotganini ko'rish mumkin. Juda qiyin bo'lgan ish. Lekin uddalasa bo'ladi. Har xolda Shevchenko buning uchun astoydil ishga kirishganini ko'rish mumkin.

Dushanba kungi mashg'ulotlarda jami 23 nafar futbolchi shug'ullandi. Ayni paytda tarkibda yuz berayotgan o'zgarishlar muxlislarning diqqat markazida turibdi desak mubolag'a bo'lmaydi. Shu bois bu borada qisqacha to'xtalib o'tadigan bo'lsak, birinchi davrada “burgutlar” sharafini himoya qilgan Sergey Docenko, Aleksey Kasyan, Javlon Mirabdullaev, Alisher Azizov, Shahzod Shaymanov hamda Kamron Kapadze shu kuni mashg'ulotlarda ko'rinishi bermadi. Aftidan bu o'yinchilar bilan jamoa xayrlashgan ko'rinadi.

“Andijon” tarkibiga yangi kelib qo'shilganlardan esa Lochin Dolimov, Bahrom Yuldashev (“Xotira-79”), Ayubxon Gapparov (“Chust-Paxtakor”) Iqbol Akramov (“Olmaliq”), Aziz Alijonov (“Neftchi”), Sardor Soibov (“Metallurg”) kabi futbolchilarni uchratdik. Hozircha bu futbolchilar ko'rikdan o'tmoqda. Agarda ularning hatti-harakatlari murabbiga maqul kelsa, jamoada olib qolinadi.

Aytishlaricha bu bilan selekciya jarayoni to'xtab qolmaydi va yaqin kunlar davomida yana bir qator taniqli nomlar yig'inga kelib qo'shiladi.

Darvoqe, og'ir jarohat sabab bir necha yil maydon tashqarisida yurgan tajribali futbolchi Shuhrat Mirxoldirshaev asosiy guruh bilan birga mashg'ulotlarda ishtirok etayotganini ham aytib o'tish lozim.

Andijonliklar ertaga, 16 iyul kuni birinchi liga vakili “UzDongJu” bilan sinov-nazorat bahsini o'tkazishni rejalashtirgan. Bu haqda ertaga aniq mulumot berib o'tamiz.

Islombek RUSTAMBEKOV.

Shevchenko “Andijon”da rasman ish boshladi