Учрашувдан сўнг бухороликлар мураббийи Виктор Карпенко фикрлари билан ўртоқлашди.

"Бунёдкор" жамоасини ғалаба билан табриклайман. Ўйиндан олдин йигитларга бундай жамоа хатоларни кечирмаслигини айтгандим. Амалда шундай ҳам бўлди. 2 та хато ва 2 та гол. Ўйинга келсак, вазиятлар кўп нарсани ҳал қилди. Биринчи бўлимда "Бунёдкор" устунликка эга бўлди, иккинчисида эса биз назорат қилишга уриндик. Яна қайтараман, ҳимоядаги хатолар мазкур натижага сабабчи бўлди",- дейди Виктор Карпенко.

- Янги футболчилар Азиз Амонов ва Тома Табатадзе борасида фикрингиз қандай?

- Улар жамоага қўшилиб бормоқда, чунки иккинчи давра олдидан мослашиш жараёнини ўтказишга кўп вақт йўқ эди. Амоновнинг ҳаракатлари ёмон чиқмади. Томага жисмоний сифатлар етишмаяпти, шу боис иккита тайм ўйнаётгани йўқ. Вақт ўтиши билан улар жамоага фойда келтиришади деган умиддаман.

- Билол Туплиев иккинчи бўлимда майдонга тушиб ўйинни кучайтирмоқда. У захира қуролими?

- Билол иккинчи бўлимда ўйинимизга тезлик қўшди. Ўйинни ўз қўлига олади. У иккинчи бўлимда кўпроқ самара келтираётгани учун фойдаланмоқдамиз. Билолда яхши ва иқтидорли футболчи. Ўйлайманки, у вақт ўтгани сари меҳнати билан яна ўзини кўрсатади.

Виктор Карпенко: "Бунёдкор" хатоларни кечирмаслигини ўйиндан аввал ҳам айтган эдим. Амалда шундай бўлди"