- Ўйин ҳақида фикрингиз?

- Ўйлайманки, учрашув мухлисларга ёқди. Ҳар икки жамоа ҳам бор кучини кўрсатишга ҳаракат қилди. Дуранг адолатли натижа бўлди. Вазиятлардан келиб чиқсак, рақиб ҳам, биз ҳам биттадан кўп гол ура олмадик.

- Ўтказиб юборилган голга муносабатингиз қандай?

- Машғулотларда ўйиндан ташқари ҳолатни юзага келтириш бўйича ишлаяпмиз. Футболчиларни бир чизиққа қўйиб тўғри ҳимояланишни ўргатамиз. Аммо ўйинда ҳаммаси биз ўйлагандек кечмайди. Қарши ҳужумда гол ўтказиб юбордиқ, тўпни вақтида рақибдан олиб қўя олмадик. Ўша вазиятда нима қилиб бўлса-да тўпни олиб қўйишимиз керак эди.

- "Бухоро" ўз дарвозасидан энг кўп гол ўтказиб юборган жамоалар қторида боряпти. Бу ҳимоя чизиғидаги хатолар билан боғлиқми?

- Жамоа кўп гол ўтказса ҳимояда хатолар борлигини билдиради. Лекин биз ўз ўрнида кўп вазиятлар яратиб кам гол уряпмиз. Демак, ҳужумда ҳам камчиликлар бор. Бу психология билан боғлиқ бўлса керак. Ўтказиб юборилган кўп голлар жуда ғалати бўляпти. Лекин бу билан фақат ҳимоячилар ёки дарвозабонни айбламоқчи эмасман. Чунки гол урганимизда бутун жамоанинг ёрдами теккани каби ўтказганимизда ҳам бутун жамоа хатоси бўлади.

- Мавсум охиригача жамоангиз аутсайдерлар қаторидан чиқиб кета оладими?

- Бунинг устида ишлашда давом этамиз. Ўйин томонлама ютқазаётганимиз йўқ, вазиятлар ҳам кўп бўляпти. Ҳаммаси ўз қўлимизда. Руҳан тикланиб олсак, юқорига кўтариламиз. Биз бемалол ўнталикка кириб олишимиз мумкин.

Виктор Карпенко: "Руҳан тикланиб олсак, юқорига кўтариламиз"