O'yin haqida

- Bugungi o'yindagi g'alaba bilan jamoamiz muxlislari va futbolchilarni tabriklayman. Raqibni 2-3 kun avval astoydil o'rganib chiqqandik. Ular so'ngi turlarda ketma-ket ochkolar jamg'arishayotgandi. Shu sababdan o'yinga nisbatan jiddiy yondashdik va yakunda o'zimiz kutgan g'alabaga erishdik.

- Ilhom aka, bugungi o'yinda ikki xil bo'lim ko'rdik. Jamoangiz futbolchilari birinchi bo'limda vaziyatlardan foydalanishda bir oz qiyinchilikka duch kelishdi. Ikkinchi bo'limda esa ulardagi faollik ortdi. O'yindan kelib chiqib yangi taktik uslublarni amalga oshirdingizmi?

- Birinchi bo'limda yigitlar ozgina shoshib qolishdi. Oldingi chiziqda yuzaga kelayotgan vaziyatlardan foydalana olishmayotgandi. Lekin ikkinchi bo'lim boshida jarimadan gol kiritdik va uyog'iga yigitlar o'zlariga kelishdi. Bu futbol, barcha vaziyatlar ham gol bilan tugayvermaydi.

- So'nggi o'yinlarda kichik Darko Stanoevich, Abdul Aziz Yusupov va Otabek Zokirov tarkibda ko'rinmayapti. Ular jamoani tark etganmi?

- Ha, ular jamoamizni tark etishdi. Nega deganda bu futbolchilarga ham o'yin amaliyoti kerak. O'ylayman-ki, ular o'zlariga yaxshi jamoalarni topishadi va o'yin amaliyotiga ega bo'lishadi. Ushbu futbolchilarning kelgusidagi faoliyatlarida omad yor bo'lishini tilayman.

- Yosh hujumchi Ulug'bek Hoshimov faollik ko'rsatayotgan bo'lsa ham gol kirita olmayapti. Bu nima bilan bog'liq deb o'ylaysiz?

- Biz Ulug'bek Hoshimovni "Paxtakor"dan yaxshi maqsadlar bilan transfer qilganmiz. Ulug'bek endigina 20 yoshga to'ldi, o'ylayman-ki uning yorqin o'yinlari hali oldinda. Legioner hujumchimiz oldinda yaxshi harakat qilmoqda. Hoshimov, Abdullaev, Abdunabievlar o'yinlar orqali tajriba to'plab yaxshi hujumchilarga aylanishadi deb umid qilamiz.

- Legioner hujumchi Marko Obradovich ketma-ket gollar urmoqda. Unga yuqori ligalardan taklif tushsa ketishi mumkinmi? Shartnomasi qanday tuzilgan?

- Bo'lishi mumkin, unga etakchi klublardan taklif tushsa balki qabul qilishi mumkin. Lekin uning biz bilan bir yillik shartnomasi bor, mavsum oxirigacha jamoamizda o'ynaydi. Ketma-ket gollar urayapti, keyingi mavsumlarda balki boshqa jamoalar uni o'z saflariga qo'shib olishlari mumkin.

Ilhom Mo'minjonov: "Jamoamizni bir qator futbolchilar tark etdi"