Uchrashuv mezbonlar uchun omadsiz boshlandi. 12-daqiqada chap qanotdan boshlangan tezkor hujum maydon markaziga keyinchalik o'ng qanotga ko'chdi. Va aynan shu qanotdan “Nasaf” jarima maydonchasiga kirib kelgan Igor Rogovanov darvozabon bilan deyarli birga bir vaziyatga chiqib bordi va osonlik bilan hisobni ochdi.

Goldan keyin mezbonlar tashabbus o'z qo'llariga olishga harakat qilishdi. Ayniqsa, Sanjar Baratovning birin-ketin raqib futbolchilarini aldab yo'llagan zarbasini Nikita Ribkin qiyinchilik bilan qaytarib yuborishga erishdi.

Ikkinchi bo'limda jamoamiz tarkibda bir qator o'zgarishlarni amalga oshirilgach, bu tez orada o'z samarasini berdi. 53-daqiqada Sanjar Baratov chap qanotdan raqib jarima maydonchasiga yorib kirdi va to'pni qarama-qarshi qanotdagi sherigiga uzatdi. Zaxiradan maydonga tushgan Doniyor Narzullaev to'pga bir tegishdayoq muvozanatni tikladi – 1:1.

Shundan keyin tashabbusni o'z qo'llariga olgan mezbonlar Nikita Ribkin darvozasi oldida ko'plab xavfli vaziyatlarni yaratishdi. Ammo faqatgina o'yin oxirlariga kelib yosh futbolchilarimiz g'alabani o'zlari tomonga og'dirib olishdi. 88-daqiqada jarohatdan qutulib ilk bor yashil maydonga chiqqan Jahongir Jiyamurdov chamasi 30 metrlar uzoqlikdan belgilangan jarima to'pini ajoyib zarbasi bilan golga aylantirgan bo'lsa, o'yinning so'nggi daqiqalarida Doniyor Narzullaevning uzoq masofdan kutilmaganda yo'llagan zarbasi darvoza to'siniga tegib to'rga yo'l oldi – 3:1. Ushbu g'alabadan keyin “Nasaf” o'rinbosarlari turnir jadvalining 3-pog'onasiga ko'tarilib olishdi.

Yoshlar ligasi, 19-tur. 19.09.2013.
“Nasaf” – “Paxtakor” 3:1 (0:1)
Qarshi shahri. “Nasaf” stadioni.
Hakamlar: Viktor Serazitdinov, Firdavs Norsafarov, Suhrob Sattorov, Jonon Hamidov.
Nazoratchi: S.Najafaliev.
“NASAF”: 23. Azamat Ahmedov, 2. Mirjalol Mo'minov (28. Mirzamurod Jo'raboev, 35), 3. JAvlon Egamov, 4. Sarvar Xolmurodov, 7. Najmiddin Normurodov (10. Akbar Murodov, 56), 8. Javohir Ashurov (16. Doniyor Narzullaev, 46), 11. Sanjar Baratov. (9. Shohruh Qurbonov, 63) 13. Tohir Abdurazzoqov, 17. Obid Mamotov (55. Jahongir Jiyamurodov, 78), 20. Jamoliddin Masharipov, (22. Diyor Karimov, 66) 33. Ilhom Usubjonov.
“PAXTAKOR”: 1. Nikita Ribkin, 27. Jaloliddin Saidov, 20. Muhsin Ubaydullaev, 28. Abboshon Maxsitaliev, 4. Abdurasul Komilov, 7. Aram Babayan, 8. Abdulloh Olimov, 17. Igor Rogovanov (23, Abbosbek Otaxonov, 78), 14. Jaloliddin Masharipov, 21. Abdulaziz Yusupov, 13. Anvar Rajapov (25. Vladislav Pavlovskiy, 46).
Gollar: D.Narzullalev (53, 90), J.Jiyamurodov (88), D – I.Rogovanov (12).
Ogohlantirish: N.Normurodov (16), M.Jo'raboev (58), A.Maxsitaliev (76).

"Nasaf" yoshlari irodali g'alabaga erishdi